जनकपुरधाम, भदौ १३ गते । प्रदेश २ मा कोरोना संक्रमणबाट शनिवार थप ७ जनाको मृत्यु भएको छ ।
सामाजिक विकास मन्त्रालय प्रदेश २ का वरिष्ठ चिकित्सक डा. कमलेश प्रसाद यादवले दिएको जानकारी अनुसार पछिल्लो २४ घण्टामा पर्सामा ३ जना, महोत्तरी र सिरहामा २/२ जनाको मृत्यु भएको हो ।
मृत्यु हुनेमा पर्साको वीरगंज महानगरपालिका वडा नं. १२ मुरलीको ४८ वर्षीय पुरुष, मनियारी २२ पर्साका ३७ वर्षीय पुरुष र वीरगंज १२ को ६५ वर्षीय महिलाको कोरोना संक्रमणबाट मृत्यु भएको छ । त्यस्तै महोत्तरीको भंगहा नगगरपालिका वडा नं. १ का ३५ वर्षीय पुरुष र पिपरा गाउँपालिका वडा नं. ७ को ७० वर्षीय पुरुष रहेका छन ।
त्यसैगरी सिरहाको सुखीपुर नगरपालिका वडा नं. ८ का ५५ वर्षीय पुरुष र लहान नगरपालिका वडा नं. १८ का ४५ वर्षीय पुरुषको कोरोना संक्रमणबाट मृत्यु भएको सामाजिक विकास मन्त्रालयले जनाएको छ ।
यो संगै प्रदेशमा कोरोना संक्रमणबाट मृत्यु हुनेको संख्या ८४ पुगेको छ । कोरोनाबाट पर्सामा ३३, बारामा १३, धनुषामा १२, महोत्तरीमा ८, सिरहामा ७, सप्तरीमा ५, रौतहट र सर्लाहीमा ३/३ जनाको कोरोना संक्रमणबाट मृत्यु भएको सामाजिक विकास मन्त्रालयले जनाएको छ ।
प्रदेशमा १ सय ६५ जना कोरोना संक्रमित थपिएका छन् । राष्ट्रिय जनस्वास्थ्य प्रयोगशाला काठमाडौँ, प्रादेशिक जनस्वास्थ्य प्रयोगशाला जनकपुर र नारायणी उपक्षेत्रीय अस्पताल वीरगंजमा गरिएको परीक्षणमा २० महिला र १ सय ४५ पुरुषमा कोरोना संक्रमण पुष्टि जनाइएको छ ।
शनिवार सबैभन्दा बढी धनुषामा ४९, सर्लाहीमा ४५, पर्सामा ३४, महोत्तरीमा २७, बारामा ९ र रौतहटमा १ संक्रमित थपिएका छन् भने ४ महिला र ८३ पुरुषगरी ८७ जना निको भएर आफ्नो घर फर्केका छन् । यस प्रदेशमा कोरोना संक्रमणबाट निको हुनेको संख्या ४ हजार ७ सय ३५ पुगेको छ ।
सबैभन्दा बढी धनुषामा ८ सय ५८ जना रौतहटमा ८ सय ७, पर्सामा ७ सय ९२, सर्लाहीमा ७ सय १८, सप्तरीमा ५ सय ८१, महोत्तरीमा ४ सय ३४, सिरहामा २ सय ७१ र बारामा २ सय ६८ जना निको भएर आफ्नो घर फर्केको सामाजिक विकास मन्त्रालय प्रदेशले जनाएको छ ।
प्रदेशमा ४ हजार ९ सय ७६ जना सक्रिय संक्रमित रहेका छन् । जसमा १ हजार ७४ जना आइसोलेशनमा रहेका छन् भने ३ हजार ९ सय २ जना होम आइसोलेशनमा रहेका छन् ।
यो विषयमा आफ्नो प्रतिक्रिया दिनुहोस् !