जनकपुरधाम, भदौ ७ गते । जनकपुरधाम स्थित काव्या होस्पीटलका चिकित्सक, स्वास्थ्यकर्मी र बिरामी सहित १८ जना संक्रमित भएका छन ।
सामाजिक विकास मन्त्रालयको स्वास्थ्य निर्देशनालयद्वारा जारी पीसीआर परीक्षण रिपोर्ट अनुसार ५ जना महिला र १३ पुरुष गरी १ वर्षदेखि ३८ वर्ष उमेरका १८ जना संक्रमित भएको हो ।
अस्पताल श्रोतका अनुसार संक्रमित हुनेहरुमा एक चिकित्सक, आइसीयूको स्वास्थ्यकर्मी ७, अस्पताल प्रशासनका २ र अन्य ८ जना बिरामी कुरुवा सहितका व्यक्ति रहेका छन ।
होस्पीटल व्यवस्थापकको लापरवाहीका यति ठूलो संख्यामा संक्रमित हुन गएको आरोप लगाइएको छ । गत साउन ३१ गते सो अस्पतालमा उपचारको क्रममा मृत्यु भएका जनकपुरधाम ६ का सोहन ठाकुरमा कोरोना पुष्टि भइसकेपनि अस्पताल व्यवस्थापकले उनको उपचारमा संलग्न चिकित्सक र स्वास्थ्यकर्मीलाई होम क्वारेन्टाईनमा नराखि ड्यिूटीमा लगाएको तिनीहरु संक्रमित भएको आरोप लगाइएको छ ।
बिहान करीब ८ बजे मृत्यु भएका सोहन ठाकुरको पीसीआर रिपोर्ट पोजेटिव १२ घण्टा भित्रै सांझ ७ बजे नै आइसकेपनि अस्पताल व्यवस्थापक र स्थानीय प्रशासन सहित सरोकार निकायले सार्वजनिक गरेनन् । बरु ठाकुरको उपचारमा खटिएका स्वास्थ्यकर्मी चिकित्सकलाई होस्पीटल व्यवस्थापकले कन्टयाक्ट ट्रेसिङ्गको आधारमा होम क्वारेन्टाइनमा बसाएर सतर्कता अपनाउनुको सट्टा ड्यिुटीमा खटाइएको अस्पताल श्रोतको भनाई छ ।
ठाकुरको पीसीआर परीक्षण रिपोर्ट आएको एक दिनपछि सार्वजनिक गरियो । उनको रिपोर्ट बारे स्थानीय प्रशासन, स्वास्थ्य निर्देशनालय र अस्पताल व्यवस्थापकले एक दिनसम्म अनभिज्ञता जनाइ रहे । यहाँसम्मको सामाजिक विकास मन्त्रालयको स्वास्थ्य निर्देशनालयले सार्वजनिक गरेको सूचीमा वडा नम्बर ६ को सट्टा १६ ठाकुरको ठेगाना उल्लेख गरियो ।
यो विषयमा आफ्नो प्रतिक्रिया दिनुहोस् !