जनकपुरधाम, भदौ ६ गते । प्रदेश २ सरकारले एशिया टप आइसोलेशन दाबी गरेका धनुषाको गंगुली स्थित आइसोलेशनमा संक्रमितलाई डाक्टर र स्वास्थ्यकर्मीको सट्टा स्वीपरले चेकजाँच गर्दै आएको छ ।
नगराईन नगरपालिका–५ गंगुलीस्थित मिथिला आयुर्वेद मेडिकल कलेजको भवनमा सामाजिक विकास मन्त्रालयले सञ्चालन गरेको आइसोलेसन केन्द्रमा सरसफाई गर्ने निरक्षर स्विपरले संक्रमितहरुको स्वास्थ्य जाँच गरिरहेको घटना सार्वजनिक भएको छ ।
सो आइसोलेसनमा बसेका एकजना सञ्चारकर्मीले व्यवस्थापन पक्षले संक्रमितको स्वास्थ्य परिक्षण डाक्टर र स्वास्थ्यकर्मीसँग नगराई स्वीपरबाट गराउने गरेको भिडियो सार्वजनिक गर्दै दाबी गरेका छन । अव्यवस्थित र फोहोर सो आइसोलेशनमा संक्रमितलाई उपचार त के पोषिलो खाना, शुद्ध खानेपानीको व्यवस्था नरहेको आरोप लाग्दै आएको छ ।
ती संचारकर्मीका अनुसार कोरोना संक्रमणको डरले संक्रमितको चेकजाँच गर्न डाक्टरहरु आउंदैनन । चेकजाँचका लागि डाक्टर तथा स्वास्थ्यकर्मी नआउने गरेको समाचार विभिन्न संचारमाध्यममा आएपछि शनिवार ती डाक्टरहरुले आफ्नो सट्टामा स्वीपरलाई टेम्परेचर चेकजाँच गर्न पठाएको थियो ।
तर त्यसलाई टेम्परेचर चेकजाँच गर्न तरिका थाहा नभएको कारण शंका लागेपछि सोधपुछ पिपिई लगाएर भित्र गएका चिकित्सक भनेर गएका व्यक्तिलाई सोध्दा आफू चिकित्सक होइन स्वीपर रहेको भनेपछि घटना सार्वजनिक भएको हो ।
ती संचारकर्मीले भने पीपीई लगाएर भित्र आएको व्यक्ति कुनै स्वास्थ्यकर्मी होला भनेर हामीले ठानेका थियौं । भित्र आएका ति व्यक्तिले थर्मल गनले पालैपालो सबैको टेम्प्रेचर जाँच्न थाल्यो अनि हामीले उसलाई सोध्यौं कि हाम्रो शरिरको टेम्प्रेचर कति छ भन्नुस त ? उ त अक्क न बक्क भयो । अनि त्यससँग तपाई को हो सोध्दा भने आफू स्वीपर हो, डाक्टर साहेब संक्रमणको डरले बाहिर बसेको छ ।
डाक्टरलाई संक्रमणको डर लाग्छ भने तपाईलाई डर लाग्दैन भन्ने जवाफमा ती स्वीपरले आफू नआएपछि जागिरबाट हटाई दिने धम्की दिदै पिपिई लगाएर जा केही हुदैन भनेर पठाउने गरेको संचारकर्मीसँग कुरामा भने । सो आइसोलेशनमा लापरवाहीको यो पहिलो घटना होइन यसअघि कयौं घटना सार्वजनिक भइसकेको छ ।
यो विषयमा आफ्नो प्रतिक्रिया दिनुहोस् !