जनकपुरधाम, साउन २७ गते । सेवाग्राहीसँग घुस लिएको आरोपमा बागमति प्रदेशका ६ जना प्रहरी निलम्बनमा परेका छन् ।
बागमती प्रदेश प्रहरी कार्यालयबाट खटिएको बिशेष प्रहरी टोलीले सेवाग्राहीसँग घुुस लिँदै गरेको अवस्थामा साउन २१ गते पक्राउ परेका ती प्रहरीहरुलाई प्रदेश प्रहरी कार्यालयले मंगलबार निलम्बन गरेका हुन ।
निलम्बन हुनेमा जिल्ला प्रहरी कार्यालय सिन्धुलीका ५ जना र काभ्रेका १ जना प्रहरी रहेका छन् । निलम्बन पर्नेमा २ जना प्रहरी हवल्दार र चार जना प्रहरी जवान रहेका छन् ।
जिल्ला प्रहरी कार्यालय सिन्धुली र सो अन्तर्गतका कार्यालयमा कार्यरत हवल्दार राजकुमार श्रेष्ठ र डोरबहादुर कार्की, जवान कुमारबाबु सिंह, धिरेन्द्र साह, राम कुमार थापा र जिल्ला प्रहरी कार्यालय काभ्रे अन्तर्गतको ईप्रका मंगलटारमा कार्यरत जवान नबिन बहादुर थापा निलम्बनमा परेका हुन् ।
सवारी चालकसँग विभिन्न वहानामा रकम लिएको भेटिएपछि नियन्त्रणमा लिई अनुसन्धानका लागि प्रदेश प्रहरी कार्यालय हेटौंडा राखिएको थियो । तिनीहरु विरुद्ध प्रदेश प्रहरी कार्यालय हेटौंडाले प्रहरी नायव उपरीक्षक बिज्ञान बस्नेतको संयोजकत्वमा गठित तीन सदस्यीय छानविन टोलीले प्रहरी आचरण विपरित काम गरेको ठहर गरेपछि निलम्बनमा परेका हुन ।
एक जना प्रहरी निरीक्षक सहित ११ जना प्रहरी कर्मचारी यसअघि निलम्बित भैसकेको छ भने ड्यूटीमा ईमान्दारीता प्रर्दर्शन गर्ने २५ जना प्रहरी कर्मचारी पुरस्कृत भैसकेको वागमती प्रदेश प्रहरी कार्यालयका सूचना समन्वय अधिकृत प्रहरी निरीक्षक रोशन थापाले जानकारी दिए ।
यो विषयमा आफ्नो प्रतिक्रिया दिनुहोस् !