जनकपुरधाम, साउन २४ गते । कोरोना भाइरस (कोभिड–१९) संक्रमण रोकथाम तथा नियन्त्रणको नाममा सिरहा नगरपालिकाले व्यापक भ्रष्टाचार गरेको पाइएको छ ।
कोरोना संक्रमण रोकथाम एवं नियन्त्रणका लागि नगरपालिकाले ७ सय ४३ रुपैयाको बेडका लागि ८ हजार ७६ रुपैयाको तन्ना र २ हजार ८ सय ७६ रुपैयो तकिया खोल प्रयोग गरिएको खर्च देखाई ब्रम्हलुट नै मचाएको छ ।
नगरपालिकाले साउन २० गते जिल्ला प्रशासन कार्यालय सिरहालाई बुझाएको खर्च विवरणमा ५ करोड ९० लाख ८६ हजार ४ सय ३० रुपैया खर्च देखाएको छ, जुन जिल्लाको सबै पालिकाभन्दा बढी रहेको छ । खर्च विवरण अनुसार ५ सयमा पाइने तन्नाको ८ हजार र मुश्किलले २ सयमा पाइने तकिया खोलको पौने २९ सय खर्च बजारभन्दा कयौ गुणा मूल्य देखाएको छ ।
सो नगरपालिकाको खर्च विवरण अनुसार खुद्रा दरमा पाइने ५ रुपैयामा पाइने मास्क २२ रुपैया, २ हजार रुपैयामा पाइने पिपिई ४ हजारमा, एक हजारको रेनकोट १६ सयमा खरीद गरिएको छ । यी सामाग्री बाहेक ग्लब्स, रेनबुट, थर्मलगन, साबून, डस्ना, कम्बल, सेनिटाइजर, विद्युतिय र खानेपानी धाराको सामाग्री समेतको खरीदमा बढी मोल देखाइएको छ ।
नगरपालिकाले १ सय ११ थान तकिया खोलको २ सय ८ सय ७६ रुपैँयाको दरले ३ लाख १९ हजार २ सय ७५ रुपैँया, ५ सय ५८ वटा तन्ना ८ हजार ७६ रुपैया दरले ४५ लाख ३ हजार ७ सय ७५ रुपैया खर्च देखाई व्यापक भ्रष्टाचार गरेको छ । सो खर्च विवरण जिल्ला प्रशासन कार्यालयलाई बुझाउंदा भ्रष्टाचार विरुद्ध केही कदम नचाल्नुको अर्थ उनको मिलोमतो हुन सक्ने आशंका गर्न थालिएको छ ।
खर्च विवरण अनुसार १ सय १५ थान रेनकोट खरिदमा नगरपालिकाले १ लाख ९३ हजार, ३ सय ३७ थान रेनवुट खरिदमा नगरपालिकाले ३ लाख १२ हजार १ सय ५०, ३ सय ४९ वटा बेड २ लाख ५९ हजार ४ सय र ८७ हजार ५ सय ७५ थान मास्क २० लाख २ हजार ९ सय ९७ रुपैँयामा खरीद गरिएको छ भने २२ वटा वडामा राहत वितरणका नाममा २ करोड ७७ लाख ७९ हजार ४ सय खर्च देखाएको छ ।
यो विषयमा आफ्नो प्रतिक्रिया दिनुहोस् !