वीरगञ्ज, साउन २३ गते । जिल्ला प्रशासन कार्यालय पर्साले बिरामीको उपचार नगर्ने निजी अस्पताललाई कारवाही गर्ने दिएको चेतावनीको दोश्रो दिनसम्म वीरगञ्ज स्थित नेशनल मेडिकल कलेजले उपचार नगर्दा दुई जनाको मृत्यु भएको छ ।
बिहीवार नेशनल मेडिकल कलेजले वीरगञ्ज ११ श्रीपुरका चलितर महतोको मृत्यु एक दिन नबित्दै वडा नं. का ६५ वर्षिय पुरुषको सोही अस्पतालले उपचार नगर्दा मृत्यु हुन गएको छ ।
नारायणी कोभिड विशेष अस्पताल गण्डकको आइसोलेसनमा भर्ना भएका वीरगञ्ज महानगरपालिका वडा नं. ३ निवास ६५ पुरुषको उपचारको क्रममा बिहिबार राती मृत्यु भएको हो ।
केहिदिन देखि सामान्य ज्वरो र रुघाखोकीबाट ग्रसित उनि बिहिबार श्वाशप्रश्वासको समस्या लिएर वीरगञ्जस्थित एडभान्स मेडिकेयर हस्पिटलमा उपचार गराउन पुगेका थिए । एडभान्समा पुग्दा उनको अक्सिजन लेभल असन्तुलित हुँदा संक्रमण लक्षण देखिएपछि चिकित्सकले नेसनल मेडिकल कलेज तथा शिक्षण अस्पताल रिफर गरिएको थियो ।
एडभान्सबाट नेसनल मेडिकल लैजान एम्बुलेन्स समेत नपाएर विरामीलाई अटो रिक्सामा राखेर अस्पताल पु¥याइएको मृतकका आफन्तले बताए । तर, नेसनलले उनलाई भर्ना नगरी ढोकाबाट नै फर्काइ दिएपछि वीरगञ्ज ३ का वडा अध्यक्ष वैजु स्वर्णकारको पहलमा गण्डक अस्पतालमा भर्ना गरियो ।
वृद्धको नेसनल मेडिकल कलेजको लापरवाहीका कारण मृत्यु भएको आफन्तले आरोप लगाएका छन् । नेसनल मेडिकल कलेज तथा शिक्षण अस्पतालको लापरवाहीका कारण दुई दिनमा दोस्रो व्यक्तिको मृत्यु भएको हो ।
जिल्ला प्रशासन कार्यालय पर्साले बिहिबार एउटा सूचना जारी गर्दै निजि अस्पतालहरुलाई विरामीहरुलाई उचित उपचार गर्न निर्देशन समेत दिएको छ । तर, निजि अस्पतालहरुले आफ्नो लापरवाही छोडेका छैनन् ।
नेशनल अस्पतालका कोभिड संयोजक डा. असरफ हुसेनसँग यस विषयमा बुझ्दा आफूलाई कुनै जानकारी नभएको बताए । उनले अस्पताललाई बद्नाम गराउन पटक पटक यस्तो गरिएको हुनसक्ने बताएका छन ।
यो विषयमा आफ्नो प्रतिक्रिया दिनुहोस् !