पार्टी प्रवेशको नतिजा : प्रदेश २ का कानून मन्त्री यादव कोरोना संक्रमित

जनकपुरधाम, साउन २२ गते । जनता समाजवादी पार्टीको धनुषामा पार्टी प्रवेश कार्यक्रम सकिएको हप्ता दिन नबित्दै प्रदेश २ का आन्तरिक मामिला तथा कानूनी मन्त्री ज्ञानेन्द्र यादव कोरोना संक्रमित भएको छ ।

जिल्लाको धनुषाधाममा बिना कुनै कोरोना नियन्त्रण सुरक्षा मापदण्ड अपनाउंदै हजारौको सहभागितामा साउन १७ गते पार्टी प्रवेश कार्यक्रम गरिएको थियो । पार्टी प्रवेश कार्यक्रम सकिएको दोश्रो दिनमै मन्त्री यादवले गराएको स्वाब संकलनमा उनी कोरोना पोजेटिभ देखिनु भएको छ ।

बुधवार सामाजिक विकास मन्त्रालयद्वारा जारी कोरोना संक्रमित रिपोर्टमा आन्तरिक मामिला तथा कानून मन्त्रालयको ८ जना संक्रमित व्यक्ति मध्ये मन्त्री यादव एक हुन । मन्त्री यादवसंगै प्रदेश सांसद रीना यादवमा समेत कोरोना संक्रमण देखिएको छ । सांसद यादव निरन्तर मन्त्रीको सम्पर्कमा रहेको कारण संक्रमित हुन पुगेको श्रोतले जनाएको छ ।

पार्टी प्रवेश कार्यक्रममा सहभागी सबै मन्त्री, सांसद, नेता र स्थानीयवासीको पीसीआर परिक्षण हुन जरुरी छ । यदि गरिएन भने झन भयावह अवस्था हुन सक्ने जसपाका एक नेताले बताएका छन ।
ती नेताले भने मन्त्री यादवसंगै बिना कुनै मापदण्डको सांसद, नेता र मन्त्रीहरु मञ्चमा बसेका थिए । मन्त्री यादवको हातबाट सयौंको सख्यामा टीका र माला लगाई पार्टी प्रवेश गरेका थिए ।

त्यसकारणले तिनीहरुमा पनि संक्रमण फैलिन सक्ने भएकोले हुनाले सबैको परिक्षण हुन जरुरी रहेको छ ।

यो पनि पढनुस्

यसैबीच प्रदेश २ का आन्तरिक मामिला तथा कानून मन्त्री ज्ञानेन्द्रकुमार यादवले आफूलाई कोरोना सक्रमण भेटिएको जानकारी दिएका छन । उनका अनुसार गत साउन १८ गते काठमाडौंबाट फर्केर १९ गते स्वाब संकलन गराउँदा रिपोर्टमा पोजेटिभ आएको हो ।

मन्त्री यादव अहिले मन्त्रालयको निवासमै होम आइसोलेशनमा बसेका छन् । उनले आफूमा संक्रमण पुष्टि भएपनि डराउन पर्ने आवश्यकता नरहेको भन्दै आफ्नो सम्पर्कमा आएका सबैलाई कोरोना परिक्षण गराउन अपिल गरेका छन् ।

मन्त्री यादव सहित मन्त्रालयका ८ जनामा संक्रमण देखिएपछि बुधवारदेखि नै मन्त्रालयको सम्पूर्ण कामकाज बन्द गरिएको छ । संक्रमित कर्मचारीको सम्पर्कमा आएका सम्पूर्ण कर्मचारीको पीसीआर परिक्षण रिपोर्ट आइसकेपछि मन्त्रालयको कामकारवाही पुनः सुचारु गरिने मन्त्रालय श्रोतले जनाएको छ ।

यसअघि मुख्यमन्त्री तथा मन्त्रिपरिषदको कार्यालय र समाजिक विकास मन्त्रालयमा समेत कर्मचारीहरुमा संक्रमण फेला परिसकेका छ । संक्रमणले गर्दा ती मन्त्रालयका कार्यालयहरु पनि बन्द रहेको छ ।

साउन यतादेखि समुदायस्तरमा प्रदेश २ मा फैलिएको कोरोना संक्रमणले अवस्था भयावह बन्दै गएको छ । हाल प्रदेशमा ५ हजारभन्दा बढी संक्रमित भइसकेका छन । संक्रमण नियन्त्रण गर्न प्रति व्यक्तिको पीसीआर परिक्षण गर्नुपर्ने मांग समाजसेवी तथा नागरिक समाजले गर्दै प्रदेश सरकारसँग गर्दै आएको छ ।