जनकपुरधाम, साउन २१ गते । कोरोना संक्रमित भएका प्रदेश २ प्रादेशिक अस्पतालका आईसीयूका स्वास्थ्यकर्मीलाई लाइसेंस खारिज र जागिर खाइ दिने धम्की दिएको आरोप लगाइएको छ ।
प्रादेशिक कोभिड १९ अस्पतालमा आईसीयूका कोरोना संक्रमित स्वास्थ्यकर्मी र कर्मचारीले व्यवस्थित र सुरक्षित नरहेको भन्दै बस्न नमानेपछि कोभिड अस्पतालका प्रमुख डा. जामुन सिंहले तिमीहरु यहाँ बसेनौं भने लाइसेंस खारेज गराएर जागिर खाई दिने धम्की दिएको आरोप लगाएका हुन ।
गत दुई दिनअघि आइसीयू सहित अस्पतालका १८ जना स्वास्थ्यकर्मी र कर्मचारीहरु कोरोना संक्रमित भएका थिए । तिनीहरुलाई नजिककै रामजानकी होटलको लजमा राखिएको थियो । विभिन्न धाक धम्की देखाई एक्कासी त्यहाँबाट सारेर आइसोलेशन बस्न ल्याइयो ।
तर आइसोलेशनमा आउंदा न त खाट थियो, न बस्ने कुनै व्यवस्था, अरु बिरामीलाई खाली गराएर फोहरै फोहर भएका अव्यवस्थित असुरक्षित आइसोलेशन कक्षमा बस्न तिनीहरुलाई नमानेपछि जागिर खाइ दिने धम्की दिइएको कुरा संक्रमित एक नर्सले बताईन । उनले भनिन हामी लक्षण विहीन संक्रमित छौं तर डा. सिंहले लक्षण भएका बिरामी सँग बस्न दबाव दिइरहेका छन ।
त्यती मात्र होइन छुट्टै शौचालयको समेत व्यवस्था छैन, लक्षण भएका संक्रमितहरुले प्रयोग गर्दै आएका शौचालय नै प्रयोग गर्न भनिरहेका छन, हामीले यस्तोमा कसरी बस्ने गुनासो गर्दा यहाँ बसेनौ भने जागिर नै खाइ दिने धम्की दिइयो ।
६ वटा रुममा ४८ बेडको आइसोलेशन कक्ष निर्माणका लागि साढे ५ करोडभन्दा बढी रकम प्रादेशिक अस्पताल जनकपुरले लिएको छ । तर व्यवस्था चाहिं अहिलेसम्म अपुरो नै रहेको छ । कहिले खाना पोषिलो भएन त कहिले सरसफाई भएन भनी सो प्रादेशिक कोभिड अस्पताल पटक पटक विवादित बन्दै आएको हो । करोडौ खर्च देखाइको सो अस्पतालमा कुनै व्यवस्था नहुनुले व्यापक अनिमितता भएको आरोप समेत लाग्दै आएको छ ।
डा. सिंहले संक्रमित बनाएको आरोप
संक्रमित स्वास्थ्यकर्मीहरुले आफूलाई डा. जामुन सिंहले संक्रमित बनाएको आरोप लगाएकी छिन । संचारकर्मीसंग कुरा गर्दै उनीहरुले भने पछिल्लो पटक उच्च संक्रमणले मृत्यु भएका शहीदनगर डुमरियाका एक बिरामीलाई आफूहरुको मनाहीका बावजूद बलजफ्ती जनरल आइसीयूमा राखि दियो ।
संक्रमित एक नर्सले भनिन जुन लक्षण देखिएका ती बिरामीलाई ल्याए त्यही दिन हामीले भन्यौं सर यो कोरोना संक्रमित हो, यहाँ नराख्नु तर मानेन बलजफ्ती राखियो बिना पिपीई सहितका कुनै सुरक्षाको उपचारका लागि ती बिरामीको सम्पर्कमा हामीलाई ल्याइयो ।
त्यती मात्र होइन ती बिरामीको मृत्यु पश्चात उच्च संक्रमण देखा परेको रिपोर्ट आइसकेपनि त्यहाँबाट हटाइएन, सोही अवस्थामा हामीलाई धाक धम्की देखाएर काम गर्न लगाएर डा. सिंहले संक्रमित बनायो ।
आरोप गलत रहेको डा. सिंहको आरोप
डा. सिंहले आफूमाथि लगाइएको आरोप गलत र निराधार रहेको बताएका छन । उनले भने लाइसेंस खारिज गरी जागिर खाई दिने धम्की होइन अनुशासनको कारवाही गर्ने भनेका छौं ।
संक्रमित भएका ती स्वास्थ्यकर्मीलाई हामीले होटलमा बसाएका थियौं तर तिनीहरु त्यहाँ छाडापन गर्न थालेपछि होटल संचालकको आग्रहमा त्यहाँबाट आइसोलेशनमा आउन भन्यौं । तर यहाँ आएर होइन हामी होटलमै बस्छौं यहाँ व्यवस्था छैन भनी अडान लिएर आन्दोलनको चेतावनी दिएपछि अनुशासनको कारवाही गर्ने भनेको हो ।
डा. सिंहले भने तिनीहरुको आग्रहमा हामीले राति नै जनकपुरदेखि महेन्द्रनगरसम्म सबै होटलमा गयौं तर संक्रमितलाई राख्न कसैले मानेन । अन्ततः आइसोलेशनकै कोठा सफा गरी त्यसमा बस्न आग्रह गरे तर तिनीहरुले मानेन ।
उनले भने ती आइसोलेशनमा मन्त्रालयदेखि अस्पतालका अन्य कर्मचारी समेत बस्दै आएका छन तर तिनीहरुलाई कुनै समस्या भएन । यिनीहरुलाई छाडापन गर्न नदिएपछि अव्यवस्थित भइसक्यो प्रतिप्रश्न गरे ।
यो विषयमा आफ्नो प्रतिक्रिया दिनुहोस् !