वीरगञ्ज, साउन १७ गते । पर्साको वीरगञ्ज महानगरपालिकामा मात्र रहेको कफ्र्यु (निषेधाज्ञा) संक्रमितको संख्या बढदै गएपछि सोमबारदेखि जिल्लाभरि अनिश्चितकालिन कफ्र्यु जारी गरिएको छ ।
शनिवार सुरक्षा समितिको बसेको बैठकबाट पछिल्लो समय कोरोना संक्रमित र संक्रमणबाट मृत्यु हुनेको संख्या बढदै गएको दृष्टिगत गर्दै सोमवारदेखि लागू हुने गरी जिल्लाभरि अनिश्चितकालिन कफ्र्यु गर्ने निर्णय गरेको छ ।
कोरोना संक्रमणको जोखिम बढदै गएको कारण रोकथामका र नियन्त्रण गर्ने उद्देश्यले जिल्लाभरि नै अनिश्चितकालीन निषेधाज्ञा जारी गर्नुपरेको पर्साका सहायक सिडिओ ललितकुमार बस्नेतले जानकारी दिएका छन ।
सोमबार बिहान ५ बजेदेखि लागू हुने गरी जिल्लाभर अर्को सूचना जारी नहुञ्जेलसम्म कफ्र्यु जारी गरिएको हो । स्थानीय प्रशासनले कफ्र्यु अवधिभर औषधोपचार र अत्यावश्यक कामबाहेक घरबाहिर ननिस्कन स्थानीयसँग आग्रह गरेको छ ।
जिल्ला प्रशासन कार्यालयद्वारा जारी सूचनामा कफ्र्यु अवधिमा शान्ति, सुरक्षा तथा सुव्यवस्था, स्वास्थ्य, खानेपानी, दुध, विद्युत, दमकल, संचार, भन्सार, आईसीपी, ड्राईपोर्ट, बैंक, क्वारेन्टाईन, फोहोर मैला व्यवस्थापन, इन्धन र एम्बुलेन्स बाहेक अन्य सम्पूर्ण पसल, उद्योग, व्यवसाय र सेवाहरु बन्द रहने जनाइएको छ ।
त्यसैगरी स्वास्थ्यकर्मी, सुरक्षाकर्मीले प्रयोग गर्ने सवारी साधन तथा अत्यावश्यक वस्तुको माल ढुवानी गर्ने सवारी साधन बाहेक अन्य सबै निजी तथा सार्वजनिक संचालनमा रोक लगाइएको छ भने सीमासँग जोडिएका तथा खुल्ला कुनै सीमानाकाबाट प्रवेशमा रोक समेत लगाइएको छ ।
कफ्र्यु उल्लंघन गरेमा कानून कारवाही गर्ने चेतावनी सहित अत्यधिक संक्रमित क्षेत्रमा नेपाल र सशस्त्र प्रहरीका संगै आवश्यकता बमोजिम सेना समेत परिचालन गरिने सूचनामा भनिएको छ ।
यो विषयमा आफ्नो प्रतिक्रिया दिनुहोस् !