जनकपुरधाम, असार २७ गते । गत केहीदिन भइरहेको अबिरल वर्षाका कारण प्रदेश २ का अन्य जिल्ला सहित धनुषा समेत बाढीको उच्च जोखिममा परेको छ ।
निरन्तर वर्षाको पानीले नदीहरुमा पानीको बहाव बढेपछि प्रदेशका राजधानी जनकपुरधाम उपमहानगरपालिकाका विभिन्न वडा सहित धनुषा जिल्लाका सबैला नगरपालिका, कमला नगरपालिका, गणेशमान चारनाथ नगरपालिका, मुखियापट्टी मुसहरनिया र जनकनन्दनी गाउँपालिका बाढीको उच्च जोखिममा परेको हो ।
कमला नदी किनारमा रहेको सबैला नगरपालिकाको ढोलबज्जा, रघुनाथपुर, पटेर्वा, मुस्लिम टोल, चोरा कोयलपुर, बतराही, सिंग्याही, हथमुण्डा, सखुवा मडान, कमला नगरपालिकाको सतोषर, बैकुटोल, नेपाली टोल, टाँडी टोल र जनकनन्दनी गाउँपालिकाको ईनरर्वा, फुलबरिया, मल्हिनिया सहितका ठाउँमा पानी पसिकेकोले कुनैपनि बेला डूबानको अवस्था आउने सक्ने जिल्ला विपत व्यवस्थापन समितिका सदस्य एवं नेपाल रेडक्रस सोसाइटी धनुषाका अध्यक्ष नरेश प्रसाद सिंहले बताए ।
उनका अनुसार जलाध नदीमा पानीको सतह बढेपछि जनकपुरधाम उपमहानगरपालिकाको वडा नं. १, १६, १७, हंसपुर नगरपालिका, नगराईन नगरपालिका र मुखियापट्टी मुसहरनिया गाउँपालिका विभिन्न स्थानमा पानीको पसेको छ । त्यसैगरी गणेशमान चारनाथ, रातो र जग्ध र विग्घी नदीको पानी समेत विभिन्न पालिकाको स्थानमा पानी पसेपछि डूबानमा पर्न सक्नेछ ।
अध्यक्ष सिंहले अझै केही दिन वर्षा निरन्तर भए र पहाडबाट पानी झरे भने कुनैपनि बेला बाढीको उच्च जोखिममा रहेका क्षेत्रहरु डूबानमा पर्न सक्ने बताए ।
वर्षातको पानीले हालसम्म कुनै हाताहातको अवस्था नरहेपनि जिल्लाका विभिन्न पालिकाको उच्च जोखिममा रहेका गाउँघरमा पानी पसेपछि डुबानको उच्च जोखिममा रहेकोले जिल्ला विपत व्यवस्थापन समिति राहत तथा उद्धारका लागि उच्च सर्तकता सहित तयारी अवस्थामा रहेको जिल्ला विपत व्यवस्थापन समितिका अध्यक्ष प्रमुख जिल्ला अधिकारी कोषहरि निरौलाले जानकारी दिए ।
बाढीबाट डूबानको पुर्व तयारी स्वरुप जिल्ला विपत व्यवस्थापन समितिले २ वटा बोट, बेल्चा, डोरी, टायर, खन्ती, लाइफ ज्याकेट सहितका राहत तथा उद्धार सामाग्री खरीद गरी राखिएको र केही सामाग्री समेत नक्टाझिज सहितका स्थानमा पठाइएको अध्यक्ष सिंहले जानकारी दिए ।
बाढीबाट बचाउ र राहत तथा उद्धारका लागि पुर्व तयारी स्वरुप केही दिनअघि सुरक्षाकर्मी सहित राहत उद्धार टोलीलाई बोट चलाउने र उद्धार कसरी गर्न सक्ने तालिम दिनुका साथै समयमै उद्धार टोली पठाउन सकेन वा पुग्न सक्ने अवस्था नरहेको कुरालाई दृष्टिगत गर्दै समुदायमै स्थानीय युवाहरुलाई राहत तथा उद्धारको तालिम दिई तयारी अवस्थामा राखिएको अध्यक्ष सिंहले बताए ।
यसका साथै बाढीबाट डूबानमा पर्न सक्ने खतराको पुर्व तयारी स्वरुप रेडक्रसद्वारा जिल्ला प्रशासन कार्यालयमा पानी बहावको मापनको लागि पुर्व सूचना प्रणालीको समेत व्यवस्था गरिएको छ । सो प्रविधिले गर्दा कुन नदीमा पानीको बहाव कति बढेको हेरेर डूबानबाट बचाउन सकिने र समयमै राहत तथा उद्धार टोली पठाउन सकिने प्रजिअ निरौलाले जानकारी दिए ।
बाढीको उच्च जोखिमलाई दृष्टिगत गर्दै गत दुई दिनअघि प्रदेश २ का मुख्यमन्त्री लालबाबु राउतले सुरक्षाकर्मीहरुलाई हाई अलर्ट रहन निर्देशन दिइसकेका छन । सोही अनुरुप धनुषा जिल्ला सहित प्रदेशका अन्य जिल्लामा सुरक्षाकर्मीहरुले पुर्व तयारीमा जुटेका छन ।
यो विषयमा आफ्नो प्रतिक्रिया दिनुहोस् !