जनकपुरधाम, असार १७ गते । विश्वव्यापी महामारी ‘कोभिड–१९’ अर्थात् कोरोना भाइरसको संक्रमण रोकथाम एवं उपचार सामाग्री खरीदमा प्रदेश २ को सामाजिक विकास मन्त्रालयमा मन्त्रीको छोराको सेटिङमा श्रृंखलाबद्ध रुपमा भ्रष्टाचार भइरहेको पाइएको छ ।
मन्त्रालय मातहतका स्वास्थ्य आपूर्ति व्यवस्थापन केन्द्र मार्फत मन्त्री नवलकिशोर साहका छोरा सुमित साहको सेटिङमा सचिव रामप्रसाद घिमिरे र केन्द्रका प्रमुख डा. प्रमोद यादवको मिलामतोमा कोरोना भाइरसको संक्रमण रोकथाम एवं उपचार सामाग्री खरीदमा श्रृखलाबद्ध रुपमा भ्रष्टाचार हुँदै आएको हो ।
केही दिनअघि पहिलो चरणमा केन्द्रद्वारा खरीद गरिएको पिपिई, सेनिटाइजर, मास्क लगायतका सामाग्रीमा भ्रष्टाचार भएको पाइएको थियो भने दोश्रो चरणमा कोरोना चेकजाँच मेसिन आरटी पीसीआर मेसिन र त्यसमा प्रयोग हुने विभिन्न सामाग्री सहित अन्य १४ वटा सामाग्री खरीदमा भ्रष्टाचार भएको विभिन्न संचार माध्यमले समाचार सम्प्रेषण गरेको थियो ।
अब मन्त्रालयले केन्द्र मार्फत खरीद गर्न लागेको आइसीयू कक्षका लागि आवश्यक पर्ने ३० वटा भेन्टिलेटर खरिदमा करोडौँ रकमको चलखेल भएको श्रोतको दाबी छ । प्राप्त जानकारी अनुसार ४ लाख रुपैयाँ पर्ने भेन्टिलेटरको मूल्य १५ लाख र ६ लाख रुपैयाँ पर्ने भेन्टिलेटरको मूल्य २५ लाख रुपैयाँ मूल्य निर्धारण गरिएको छ ।
प्रति भेन्टिलेटर ४ लाख रुपैयाँमा खरिद गर्दा ३० वटा भेन्टिलेटरको मूल्य १ करोड २० लाख रुपैयाँ पर्छ । जबकि १५ लाख रुपैयाँको दरले ३० वटा भेन्टिलेटर खरिद गरेमा यसको मूल्य ४ करोड ५० लाख रुपैयाँ पर्छ । यसरी भेन्टिलेटर खरिदमा मात्रै ३ करोड ३० लाख रुपैयाँ भ्रष्टाचार हुने श्रोतको दाबी छ ।
मन्त्रालयका एक अधिकारीका अनुसार ३८ करोड, १८ करोड र ११ करोड गरी ३ पटक बोलपत्र आह्वान गरिएको छ । मेडिको, होस्पिटेक, मेडी सोलुसन गरी ८ कम्पनीले तीनवटै बोलपत्रमा प्रस्ताव दर्ता गराएका छन् । तीनवटै बोलपत्रमध्ये काठमाडौँको होस्पिटेड ईन्टरप्राईजेजले ठूलो हिस्सा पाउने लगभग निश्चित भइसकेको स्रोतको दावी छ । होस्पिटेड ईन्टरप्राईजेजका संचालक विशाल पण्डितले सेटिङ मिलाएर सो ठेक्का हात पारेको बताइएको छ ।
गत वैशाखमा प्रदेश मन्त्रिपरिषदको बैठकले विभिन्न स्वास्थ्य सामग्री तथा उपकरणहरु खरिद गर्ने निर्णय गरेको थियो । सोही निर्णय बमोजिम केन्द्रले विभिन्न क्षमताको ३० वटा भेन्टिलेटर खरिद गर्न बोलपत्र आह्वान गरिसकेको छ । बोलपत्रको अन्तिम मिति बुधबार अर्थात असार १७ गते तोकिएको छ ।
आइसीयु निर्माणका लागि अन्य उपकरणहरु समेत खरिद गर्ने तयारी भइरहेको छ । जसका लागि ४० करोेड रुपैयाँ बराबरको बोेलपत्र आह्वान हुने मन्त्रालयले जनाएको छ ।
मन्त्रालयका एक अधिकारीका अनुसार ठेक्काको विषय टुङ्ग्याउन प्रदेश २ का सामाजिक विकास मन्त्री नवल किशोर साहका छोरा सुमित साहले ठूलै दौडधूप गरेका थिए । सुमित र सो कम्पनीका कर्मचारीहरुबीच चारपटक जनकपुरको एक होटेलमा भेटघाट समेत भएको स्रोतको दावी छ । कमिशनमा कुरो मिलेपछि मात्रै सो कम्पनीलाई बोलपत्रको ठूलो हिस्सा जिम्मा लगाउन लागिएको मन्त्रालय स्रोतले भनाई छ ।
मन्त्री नवलकिशोर साह रहे पनि उनका छोरा सुमित साहले नै मन्त्रालय सम्हाल्ने र ठेक्कापट्टा तथा कोरोना सामाग्री खरीददेखि मिडिया ब्रिफिङ लगायतका हरेक योजनाहरुमा अप्रत्यक्ष रुपमा हस्तक्षेपकारी भूमिका निर्वाह गर्दै आएको मन्त्रालयको एक अधिकारीले बताए ।
समाजिक विकास मन्त्री नवलकिशोर साहले आफूलाई यस विषयमा कुनै किसिमको जानकारी नरहेको बताए । उनले भने, ‘सबै उपकरण खरिद गर्ने कार्य आपूर्ति महाशाखाले गर्ने हो, यदि अनियमितता हुँदैछ भने तपाईहरु भ्रष्टाचार हुँदैछ भन्ने समाचार लेख्नुस्, यस विषयमा छानविन हुन्छ ।
प्रदेश स्वास्थ्य आपूर्ति व्यवस्थापन केन्द्रका प्रमुख डा. प्रमोद यादवले प्रक्रिया पु¥याएर टेण्डर आह्वान गरिएको र सोही अनुसार काम कारवाही हुने जनाए । उनले अहिलेसम्म कुनै किसिमको अनियमितता भएको छैन । सबै प्रक्रिया पारदर्शीरुपमा भएकोले कुनै किसिमको भ्रष्टाचार र अनियमितता नभएको दाबी गरेका छन ।
यो विषयमा आफ्नो प्रतिक्रिया दिनुहोस् !