जनकपुरधाम, असार ९ गते । वडाअध्यक्षको विरोधले मंगलवार हुने भएको जनकपुरधाम उपमहानगरपालिकाको पांचौ सभा रोकिएको छ ।
सभाको तयारीका लागि योजना तर्जुमा सम्बन्धी बसेको बैठकमा मेयर लालकिशोर साहले एकलौटी निर्णय गर्न खोजेको भन्दै वडाध्यक्षहरुले आरोप लगाउंदै माइनेट च्यातेपछि दुवै पक्षबीचको विवाद हात हालाहालको अवस्था समेत आएको थियो ।
मेयरको विरोधमा वडाध्यक्षहरुले विरोध गर्दै मंगलवार उपमहानगरपालिका कार्यालय अगाडि धर्ना दिएपछि गणपुरक संख्या पुग्न नसकेपछि नगर सभा हुन सकेन । नगरसभा हुने दिन पनि उपमहानगररपालिका कार्यालय अगाडी रातिदेखि नै तनाव कायम छ ।
सम्भावित दुर्घटनाको दृष्टिगत गर्दै धर्नास्थलमा व्यापक संख्यामा प्रहरी परिचालन गरिएको थियो । विरोधमा रहेका वडाध्यक्ष तथा कार्यपालिका सदस्यहरुले मेयर लालकिशोर साह तानासाही भएको र वडाहरुमा न्युन बजेट मात्र दिन खोजेको आरोप लगाउंदै आएका छन ।
उपमहानगरपालिकाका प्रशासकीय अधिकृतले एक सूचना गरी गणपुरक संख्या नपुगेको कारण असार ९ गते भनिएको नगर सभा स्थगित गरिएको जानकारी गराउंदै असार १० गते बिहान ८ बजे हुने भनेको छ ।
यसैबीच उपमहानगरपालिकाकाको नगरसभा सञ्चालनका लागि गणपुरक संख्या पुरयाउन फर्जी हस्ताक्षर गरेको गरेको आरोप लगाइएको छ । नगरसभाको विरोधमा वडाध्यक्षहरु उत्रिएपछि नगरप्रमुख पक्षधरहरुले वडाध्यक्षहरुको फर्जी हस्ताक्षर गरेको पाइएको हो ।
उपमहानगरको कार्यालयको बाहिर वडाध्यक्षहरु धर्नामा रहेको समय नगरसभाको लागि बहुमत पु¥याउन उपमहानगरको कार्यालयभित्र फर्जी हस्ताक्षर जम्मा गर्ने कार्य भइरहेको जनकपुरधाम उपमहानगरपालिका वडा नम्बर ३ का वडाध्यक्ष दिपेन्द्र साहले आरोप लगाएका छन ।
नगरसभाको पक्षमा हस्ताक्षर गर्ने को–को हुन् भनेर बुझ्न खोज्दा नगरपालिकाका कर्मचारी नसिम राइनले हस्ताक्षर गरिएको कागज नै च्यातेको वडा नं. ३ का वडाध्यक्ष साहले बताए ।
नगरसभा सञ्चालन गर्न नदिने पक्षमा वडाध्यक्ष, कार्यपालिका सदस्य र वडा सदस्यहरु गरी ७४ जनाले हस्ताक्षर गरेका छन् । कुल १ सय ३३ सदस्यमध्ये ७४ जनाले नगरसभाको विरुद्धमा हस्ताक्षर गरेका छन् ।
यो विषयमा आफ्नो प्रतिक्रिया दिनुहोस् !