जनकपुरधाम, असार ९ गते । प्रदेश २ स्थित कपाल काटने नाईहरुले २४ घण्टा भित्र आफुहरुको माग सम्बोधन नभए प्रदेशभरिका सैलुनहरु खोल्ने चेतावनी दिएका छन ।
नेपाल नाई संघको अगुवाईमा सैलुन संचालकहरु ज्ञापन पत्रको मांग पुरा नभएको भन्दै जुलुस प्रदर्शन गर्दै मुख्यमन्त्री तथा मन्त्रिपरिषद कार्यालय पुगेर मुख्यमन्त्री लालबाबु राउतलाई मांग पुरा गर्न स्मरण पत्र बुझाएका छन ।
कोरोना भाइरसको रोकथाम एवं नियन्त्रणका लागि जारी लकडाउनले गर्दा लामो समयदेखिको आफुहरुको व्यापार व्यवसाय चौपट भएको भन्दै सैलुन खोल्ने वातावरण मिलाइदिन उनीहरुले गत जेठ २७ गते नै प्रदेश २ का मुख्यमन्त्री लालबाबु राउतलाई ज्ञापनपत्र बुझाएका थिए ।
तर अहिलेसम्म पनि सरकारले आफुहरुको पीडालाई नबुझेकोले बाध्य भएर सैलुन खोल्न लागेको नेपाल नाई संघ प्रदेश २ का अध्यक्ष चन्देश्वर ठाकुरले बताए ।
ठाकुरले कोरोना महामारीका कारण प्रदेशभरिका ३ हजार नाई श्रमिकहरुको व्यवसाय धरापमा परेको र उनीहरुलाई आफ्नो परिवारको खर्च जुटाउन समेत समस्या भइरहेको गुनासो गरे ।
सरकारले गत चैत ११ गतेदेखि लकडाउन जारी भएदेखि लकडाउन खुकुलो बनाउंदा समेत सैलुन खोल्नमा प्रतिबन्ध लगाइएपछि नाई संघसँग आबद्ध सैलुन संचालकहरु सैलुन खोल्न मांग गर्दै आएका छन ।
सैलुन संचालकहरुले आफुलाई लकडाउन अवधिभरको कोठा भाडा र पसल भाडा छुटको व्यवस्था हुनुपर्ने,बैंक तथा सहकारी संस्थाबाट लिएको नाई श्रमिकहरुको ऋणको ब्याज मिनहा हुनुपर्ने,नाई श्रमिकहरुलाई राहतको व्यवस्था हुनुपर्ने लगायतका माग अघि सारेका छन ।
यो विषयमा आफ्नो प्रतिक्रिया दिनुहोस् !