सप्तरी, असार ७ गते । सप्तरीको क्वारेन्टाइनबाट एक गर्भवती महिला फरार भएकी छिन् ।
राजविराज नगरपालिकाका स्थित राजदेवी माध्यमिक विद्यालयको क्वारेन्टाइनबाट ती महिला फरार भएकी हुन् । क्वारेन्टाइनमा खटिएका महिला स्वास्थ्यकर्मीका अनुसार ती महिला २ महिनाकी गर्भवती रहेकी थिइन ।
मध्यरातमा सबैजना सुतेको बेला विद्यालयको पछाडिबाट भागेको हुनसक्ने क्वारेन्टाइन इञ्चार्ज हरिवंश यादवले बताएका छन । उनका अनुसार ती महिला १६ वर्षिया किशोरी रहेकी थिइन, क्वारेन्टाइनमा बसेकाहरुको गिन्ती गर्ने क्रममा फेला नपरेपछि किशोरी भागेको पत्ता लागेको हो ।
कोठाका झ्यालको फलामे छड बङ्ग्याएर भागेको अनुमान गर्दै जिल्ला प्रहरी कार्यालय सप्तरीका प्रहरी नायब उपरीक्षक तिलक भारतीले महिलाको खोजी गरिएपनि हालसम्म फेला नपरेको बताए ।
भारतको दिल्लीबाट आएकी ती महिला जेठ २५ गतेदेखि क्वारेन्टिनमा बस्दै आएकी थिइन् । गत माघ १३ गते एक युवकसँग भागेर भारतको दिल्ली गएकी महिलालाई उनकी आमाले बोलाएपछि राजविराज आएकी थिइन् ।
राजविराज आएपछि क्वारेन्टाइनमा बसेको १० दिनपछि भागेकी ती महिला जान सक्ने घर, माइत, आफन्तकहाँ खोजी गरे पनि फेला नपरेको प्रहरीले जनाएको छ ।
यो विषयमा आफ्नो प्रतिक्रिया दिनुहोस् !