जनकपुरधाम, असार ४ गते । कोरोना भाइरस महामारीको सम्भावित जोखिमलाई दृष्टिगत गर्दै बन्द रहेको जानकी मन्दिरको मूल ढोका ८१ दिनपछि श्रद्धालुहरुको लागि खोलिएको छ ।
कोरोना भाइरसको रोकथाम एवं नियन्त्रणका लागि जारी लकडाउनको शुरुवातमै गत चैत १५ देखि करोडौ हिन्दु धर्मावलम्बीहरुको आस्थाको केन्द्र जनकपुरधामस्थित जानकी मन्दिरको मूलढोका इतिहासमा पहिलो पटक जिल्ला प्रशासनको आदेशमा बन्द गरिएको थियो ।
मन्दिरमा आउने श्रद्धालुको स्वास्थ्य कोरोना भाइरसबाट हुन सक्ने सम्भावित खतरालाई दृष्टिगत गर्दै देशभरिका मन्दिर मस्जिद बन्द गरिएकोमा जानकी मन्दिरको मूल ढोका पनि श्रद्धालुहरुको लागि बन्द गरिएको थियो ।
पछिल्लो पटक सरकारले आंशिक रुपमा लकडाउन खुल्ला गर्ने निर्णय गरेपछि जानकी मन्दिरको मुलढोका पनि श्रद्धालुहरुका लागि बिहीवारदेखि खुल्ला गरिएको छ । यसअघि मूलढोका बन्द गरी भित्रै पुजारीले भगवानको पूजापाठ गर्दै आएका थिए ।
सरकारले लकडाउन पनि खुकुलो पारिसकेको र श्रद्धालु भक्तजनहरुको आस्थाको केन्द्र रहेको जानकी माताको दर्शनको लागि लामो समयसम्म रोकटोक गर्न नमिल्ने हुनाले व्यवस्थित रुपमा भीडभाड नहुने गरी दर्शनका लागि मन्दिरको पट खोलिएको छोटा महन्त रामरोशन दासले जानकारी दिए ।
उनले दर्शन गर्न आउने श्रद्धालुहरुलाई सामाजिक दूरीको पालना गराउनेतर्फ पहल गरिदिन र दैनिक रुपमा मन्दिरलाई सेनिटाइज गर्ने व्यवस्था मिलाइदिन जनकपुरधाम उपमहानगरपालिकासँग आग्रह समेत गरेको छ ।
यो विषयमा आफ्नो प्रतिक्रिया दिनुहोस् !