जनकपुरधाम, जेठ २७ गते । महोत्तरीको बर्दिबास नगरपालिका स्थित क्वारेन्टाइनमा रहेका १५ जनामा कोरोना संक्रमण पुष्टि भएको छ ।
प्राप्त जानकारी अनुसार बर्दिबास नगरपालिका वडा नम्वर २, लच्काटोलमा १ जना, वडा नम्वर ५, चेरुमा १ जना र वडा नम्वर १३, बिजलपुरामा १३ जना गरि १५ रहेको छ । बर्दिबासमा यो पहिलो पटक भेटिएको कोरोना संक्रमित हो ।
संक्रमित देखिएकाहरु मध्ये जेठ १३ गते भारतको चेन्नईबाट १, गोबाट १ र अहमदाबाद १३ जना आएको थियो । तिनीहरुलाई नाका प्रवेश गरे लगतै बर्दिबासस्थित सामाजिक सेवा संस्थान र जनसेवा अस्पतालको क्वारेन्टाइनमा राखिएको थियो ।
आइसोलेशनको व्यवस्था नहुँदा अहिले कोरोना संक्रमितहरु बर्दिबास क्वारेन्टाइनमै निगेटिभ र पोजेटिभलाई छुट्टाछुट्टै रुपमा राख्ने गरी व्यवस्थापन गरिएको बर्दिबास नगरपालिकाका प्रमुख प्रशासकीय अधिकृत रेवती प्रसाद पराजुलीले जानकारी दिएका छन ।
उनले भने संक्रमितहरुलाई आइसोलेशनमा राख्न जिल्ला अस्पताल, प्रादेशिक अस्पताल सहित प्रदेश सरकारका स्वास्थ्य निकायलाई जानकारी गराइसकेका छौं तर तिनीहरुले बेड खाली नरहेको जवाफ दिएका छन । अब अन्त प्रदेशमा राख्न मिल्दैन, त्यसैले बर्दिबास स्थित निर्मित नयाँ अस्पतालमै आइसोलेशन कक्ष निर्माण गर्न लागेका छौं ।
नयाँ भवन भएको कारण धेरै कुरा व्यवस्थापन गर्न समय लाग्न सक्ने भएको हुनाले चाँडै पालिकाको आफ्नै आइसोलेशन कक्ष निर्माण गरी त्यसमा राख्ने छौं, तबसम्म सुरक्षित र व्यवस्थित रुपमा क्वारेन्टाइनमा राख्छौं अधिकृत पराजुलीले भने ।
बर्दिबासमा यसअघि एक जना सहित संक्रमितको संख्या १६ पुगिसकेको छ ।
यो विषयमा आफ्नो प्रतिक्रिया दिनुहोस् !