जनकपुरधाम, जेठ २७ गते । वैश्विक महामारी कोरोना भाइरसको रोकथाम एवं नियन्त्रणका लागि जारी लकडाउन अवधिमा प्रत्येक दिन औसतन १६ जनाले आत्महत्या गर्ने गरेको प्रहरी तथ्यांकले देखाउंछ ।
चैत ११ गतेदेखि जारी लकडाउन अवधिमा हालसम्म देशभरिमा १ हजार एक सय ५ जनाले आत्महत्या गरेको कुरा नेपाल प्रहरी प्रवक्ता डिआईजी निरजबहादुर शाहीले बताएका छन ।
कोभिड–१९ महामारीले हालसम्म १५ जनाको मृत्यु भएको छ तर महामारी नियन्त्रण तथा रोकथामका लागि गरिएको लकडाउनका बेला आर्थिक तंगीले ठूलो संख्याले आफ्नै हत्या गर्न थालेका छन ।
प्रहरीका अनुसार वागमती प्रदेशमा लकडाउन सुरु भएयताको ६९ दिनमा २ सय ३१ जनाले आत्महत्या गरेका छन् । जसमध्ये ६९ जना काठमाडौं उपत्यकाका छन् । यस हिसाबले काठमाडौं, भक्तपुर र ललितपुरमा औसतमा दैनिक एकजनाले आत्महत्या गर्दै आएको देखिन्छ ।
सबभन्दा बढी आत्महत्या प्रदेश ५ मा गरेको घटना छ । प्रहरीक अनुसार प्रदेश ५ मा हालसम्म दुई सय ४२ जनाले आत्महत्या गरेका छन् । प्रदेशगत हिसाबले यो सबभन्दा धेरै हो । यो प्रदेशमा सबभन्दा बढी ३८ हजार पाँच सय ८७ जना क्वारेन्टाइनमा रहेका छन् ।
लकडाउन जारी भएको ११ चैत यतादेखि ६९ दिनमा प्रदेश १ मा एक सय ८६, प्रदेश २ मा एक सय ५२, गण्डकीमा एक सय २१, कर्णालीमा ५८ र सुदुरपश्चिम प्रदेशमा एक सय १५ जनाले आत्महत्या गरेको डिजाइजी शाहीले बताएका छन ।
लकडाउन सुरु भएयता भने पाँच सय ७१ पुरुष, तीन सय ९६ महिला, ५२ बालक र ८६ बालिकाले आत्महत्या गरिसकेका छन् । कोभिड– १९ का बेला स–सानो कुरामा पनि आत्महत्या रोज्ने प्रवृत्ति देखिएको जानकारहरू बताउँछन् ।
लामो लकडाउनले आर्थिक अवस्थाले व्यक्तिमा मानसिक स्वास्थ्यमा पारेको प्रभावको कारण आत्महत्याको घटना बढेको मनोचिकित्कसकहरुको भनाई हो ।
कोरोना महामारीका बीच जारी लकडाउन, रोजगारी गुम्ने, व्यवसाय डुब्ने अवस्था, भविष्यको अनिश्चिता जस्ता कारणले मानसिक रोगीको संख्या बढेको र त्यही अनुपातमा आत्महत्या गर्ने दर पनि बढेको मनोचित्सिकहरू भन्छन ।
मनोविश्लेषक डा. वासु आचार्य पहिलो पटक यति लामो समय घरमै थुनिएर बस्नुपर्दा, व्यवसाय सञ्चालन गर्न नपाउँदा, लकडाउनपछि जीवनयापन सहज हुन्छ भनेर आशावादी हुन नसक्ने अवस्था आदि कारणबाट कतिपयले आत्महत्याको गलत बाटो रोजेको हुन सकने बताउँछन् ।
डब्ल्यूएचओका अनुसार भारतमा प्रतिएक लाखमा १८.५ जनाले आत्महत्या गर्छन् । नेपालको अवस्था हेर्दा प्रतिएक लाख ११.४ जना आत्महत्या गर्नेको अवस्था छ ।
डब्ल्यूएचओको अध्ययनमा समेटिएका एक सय ८३ देशमध्ये आत्महत्या हुने देशको ८१ औं स्थानमा नेपाल छ । कोरोना महामारीका बेला सरकारले नागरिकमा उत्साह जगाउने काम गर्नुपर्ने देखिन्छ । आवश्यकता अनुसार संक्रमित वा अरूलाई मनोपरामर्शको व्यवस्था गर्नुपर्ने जानकारहरूको भनाई छ ।
यो विषयमा आफ्नो प्रतिक्रिया दिनुहोस् !