काठमाडौ, जेठ २० गते । चीन–भारत सीमा विवादलाई लिएर अमेरिका चिन्तित भएको छ ।
अमेरिकी विदेश मामिला संसदीय समितिका प्रमुख एलियट एल एन्जलले एक बयान जारी गर्दै भनेका छन, ‘भारत र चीनको वास्तविक नियन्त्रण रेखा नजिक चीनको आक्रमकतालाई लिएर हामी चिन्तित बनेका छौं ।
चीनले फेरि आफ्ना छिमेकीहरूसँग शक्ति प्रदर्शन गर्ने कुरामा विश्वस्त छ र अन्तर्रा्ष्ट्रिय कानुन अन्तर्गत वार्ताबाट यस समस्याको समाधान खोज्ने प्रयास गरिरहेको छैन ।
बयानमा उनले सबै देशका लागि एक समान अन्तर्रा्ष्ट्रिय कानुन छ जसलाई सबैले पालना गर्नुपर्छ । जसको लाठी त्यसको भैँसीजस्तो स्थिती नबनोस् । सीमा विवाद सुल्झाउन सबै मापदण्डलाई सम्मान गरौं, कुटनीति र यथावत् प्रणालीलाई पछ्याउन चीनसँग आग्रह गरेको छ ।
सोमबार मात्र चीनले सीमा विवाद समाधान गर्न दुवै देशबीच कुटनीतिक छलफल हुनुपर्नेमा जोड दिएको थियो । चीनको विदेशमन्त्रालयका प्रवक्ता जाओ लिजिएनले सोमबार पत्रकार सम्मेलनमा भनेका थिए, हाल भारत–चीन सीमाको स्थिती स्थिर छ। सीमा विवाद समाधान गर्न भारत र चीनबीच कुटनीतिक र सैन्य स्तरको सबै बाटो खुलाउनुपर्छ ।
गएको केही हप्तादेखि पूर्वी लद्दाख र सिक्किम नजिकको वास्तविक नियन्त्रण रेखा नजिक भारत र चीनका सेना आमने सामने भएका छन् । दुवै सेनाबीच झडप भएको खबर पनि छ ।
भारतले यसअघि वास्तविक नियन्त्रण रेखाको आफूले सम्मान गर्ने बताउँदै उक्त क्षेत्रमा चिनियाँ सेना सक्रिय भएको र भारतीय सेनालाई चिनियाँ सेनाले गस्ती गर्नमा बाधा पुर्याएको बताएको थियो ।
यसैबीचमा अमेरिकी राष्ट्रपति डोनाल्ड ट्रम्पले भारत–चीनबीचको सीमा विावद समाधान गर्न आफू मध्यस्थता गर्न इच्छुक भएको बताएका थिए । ट्रम्पले भनेका थिए, भारत–चीन गतिरोधको शान्तिपूर्ण समाधानका लागि चीनसँग वार्ता भइरहेको छ ।
गएको चार हप्तादेखि भारत र चीनबीच सीमा सम्बन्धी तनाव जारी छ । भारत र चीनका हजारौं सैनिक विवादित क्षेत्र गलवान र पानगोङमा आमने सामने तैनाथ छन् । चिनियाँ सेनाले गलवान उपत्यकाको किनारमा टेन्ट लगाएको भनेर भारतीय पक्षले आरोप लगाएपछि यतिबेला तनाव बढेको हो ।
गलवान उपत्यका लद्दाख र अक्साइ चीनको सीमा नजिक पर्छ । यहाँनेर वास्तविक नियन्त्रण रेखाले अक्साई चीन र भारतलाई अलग गर्दछ । यो उपत्यका चीनको दक्षिणी सिनजियाङ र भारतको लद्दाखसम्म फैलिएको छ ।
विवादसँगै भारतले यहाँ सेना थपेर तैनाथ गरेको छ । चीनले पनि भारतले गलवान उपत्यका नजिक गैरकानुनी रुपमा क्याम्पहरु खडा गरेको आरोप लगाएको । गत मे ९ मा उत्तरी सिक्किमको नाथु ला सेक्टरमा भारतीय र चिनियाँ सेनाबीच झडप भएको थियो । बीबीसी हिन्दी
यो विषयमा आफ्नो प्रतिक्रिया दिनुहोस् !