काठमाडौ, जेठ १५ गते । नेपाल सरकारले गणतन्त्र दिवसको अवसरमा २ सय ३३ जना कैदीको कैद सजाय मिनाहा गरेको छ ।
त्यस्तै आठ जना व्यक्तिहरुको कैद, दण्ड जरिवाना, बिगो, सर्वस्वलगायतको सजाय माफी पनि गरिएको छ । सरकारको सिफारिसमा राष्ट्रपति विद्यादेवी भण्डारीले कैद सजायँ मिनाहा र दण्ड जरिवाना माफी दिएकी हुन् ।
राष्ट्रपति कार्यालय शितल निवासबाट जारी विज्ञप्ति अनुसार रामबहादुर भन्ने रमेश विश्वकर्मा समेतका २ सय ३३ जना कैदीहरुको बाँकी कैद सजायँ माफी मिनाहा भएको छ ।
त्यसैगरी कपिलदेव साह कानू समेतका आठ जना व्यक्तिहरुलाई बिभिन्न अदालत, न्यायिक वा अर्धन्यायिक निकाय वा प्रशासकीय पदाधिकारी वा निकायबाट बिभिन्न मितिमा भएका फैसला बमोजिम लागेको कैद, दण्ड, जरिवाना, विगो, सर्वस्वलगायतको सजाय माफी गरिएको विज्ञप्तिमा भनिएको छ ।
यो विषयमा आफ्नो प्रतिक्रिया दिनुहोस् !