जनकपुरधाम, जेठ १३ गते । प्रदेश २ मा कोरोना भाइरसबाट संक्रमित हुनेको संख्या २ सय ६८ पुगेको छ ।
मंगलवार ९० जना संक्रमित पुष्टि भएकोमा ३५ जना प्रदेश २ कै रहेको समाजिक विकास मन्त्रालयका सचिव डा.रामप्रसाद घिमिरेले जनाएका छन । उनका अनुसार रौतहटमा २२, सिरहामा ५, बारामा ५, महोत्तरीमा २ र धनुषामा १ जना संक्रमित थपिएको छ ।
धनुषामा कोरोना संक्रमण पुष्टि भएका एक पुरुष मुखियापट्टी मुसहरनिया गाउँपालिका बेलाका २२ वर्षीय युवक छन् । यस्तै महोत्तरीका पुष्टि भएका पुरुष मनरासिसवा नगरपालिका १० का ३० र ३५ वर्षका रहेको स्वास्थ्य तथा जनसंख्या मन्त्रायले पुष्टि गरेको छ ।
प्रदेश २ मा पछिल्लो २४ घण्टामा भेटिएका सबै संक्रमितहरुलाई आइसोलेशन अस्पतालमा उपचारको व्यवस्था मिलाइएको सचिव घिमिरेले बताएका छन । यसैबीच प्रदेशमा उपचार पश्चात ९३ जना निको भएर घर फर्केको बताइएको छ ।
हालसम्म प्रदेश २ को पर्सा जिल्लामा ९४, बारामा ४१, धनुषा १२, रौतहट ७१, महोत्तरी ६, सप्तरी ४, सिरहा ६ र सर्लाहीमा ३४ कुल २ सय ६८ जनामा संक्रमित पुष्टि भएको छ । पर्सामा संक्रमित भेटिएका मध्ये एक जना कैलालीका हुन भने ३ जना भारतीय नागरिक रहेका छन ।
संक्रमित व्यक्तिहरु अधिकांश भारतबाट आएका र उनीहरुको सम्पर्कमा गएकाहरुलाई कोरोना संक्रमण भएको मन्त्रायले बताएको छ । नेपाल भारत खुल्ला सीमाको कारण प्रदेश २ मा कोरोना संक्रमणको अवस्था भयाबह बन्दै गएको सचिव घिमिरेको भनाइ छ ।
यो विषयमा आफ्नो प्रतिक्रिया दिनुहोस् !