जलेश्वर, जेठ १४ गते । महोत्तरी गाउँपालिकाले कोरोना भाइरस रोकथाम एवं नियन्त्रणका लागि हालसम्म जनचेतनामूलक सूचना सन्देश प्रवाहदेखि राहत वितरणसम्मको कार्यलाई निरन्तरता दिएका छन ।
नेपालमा कोरोना संक्रमित भेटिएदेखि गाउँपालिकामा सचेतना एवं सर्तकताका लागि वडाहरुमा जनचेतनामूलक सूचनाको बोर्ड, पर्चा पम्पलेट र फ्लैक्स बोर्ड लगायतका झुण्डयाउनेदेखि टोल टोलमा व्यक्तिहरुलाई मास्क र साबून वितरण कार्यलाई निरन्तरता दिदैं आएको छ ।
कोरोना भाइरस रोकथामका जारी लकडाउनले मार्कामा परेका दैनिक ज्यालादारीमा काम गर्ने मजदूर, दलित, गरीब र अतिविपन्न विपन्न परिवारलाई दुई चरणमा राहत वितरण कार्य हालसम्म सम्पन्न भइसकेको कुरा गाउँपालिका अध्यक्ष सुनिलकुमार रायले बताएका छन ।
उनले भने पहिलो चरणमा प्रदेश सरकारले उपलब्ध गराएको १० लाख रुपैयामा पालिकाको कोषबाट थपेर ५ हजार ३ सय ८० घर परिवारलाई २० किलो चामल, ३/३ किलो दाल र आलू, एक किलो नून, तेल, सोयाबीन र साबून सहित प्रति परिवार २ सय रुपैया नगद वितरण गरिएको छ ।
दोश्रो चरणमा प्रदेश सरकार आफै घरेलु कार्यालयद्वारा वडा कार्यालय मार्फत प्रत्येक वडामा ७० जनाको दरले राहत वितरणको कार्य सकिएको छ ।
त्यसैगरी कोरोना भाइरसको शंकास्पद तथा लकडाउन अवधिमा भारतबाट आउने नेपाली नागरिकको निगरानीको लागि वडा नम्बर २ स्थित रा.स.मा.वि. मा क्वारेन्टाईन निर्माण समेत गरिएको छ ।
शुरुमा १० बेडको निर्माण गरिएको क्वारेन्टाईन शंकास्पद र भारतबाट आउनेहरुको संख्या बढदै गएपछि त्यसलाई बढाएर सय बेडको बनाइएको जानकारी दिदैं अध्यक्ष रायले पालिका स्थित ३ वटा स्वास्थ्य संस्था र क्वारेन्टाईनमा रहेका स्वास्थ्यकर्मीलाई गाउँपालिकाकै कोषको रकमबाट पिपिई, मास्क, ग्लब्स लगायतका उपचार सामाग्री खरीद गरिएको बताए ।
हालसम्म पालिकाको कोषबाट २ करोड रुपैयासम्म खर्च भइसकेको छ, तर प्रदेश सरकारले उपलब्ध गराएको १० लाख बाहेक प्रदेश वा संघीय सरकारबाट कोरोना भाइरस सम्बन्धमा कुनैपनि सहयोग नभएको अध्यक्ष रायको भनाई छ ।
यो विषयमा आफ्नो प्रतिक्रिया दिनुहोस् !