जनकपुरधाम, जेठ ८ गते । हत्या आरोपमा महोत्तरीको युवकलाई कतारमा गोली हानी मृत्युदण्ड दिइएको छ ।
वैदेशिक रोजगारीमा रहेका महोत्तरीको औराही नगरपालिका १ का अनिल चौधरीलाई मृत्युदण्ड दिइएको छ । कतारमा नेपाली नागरिकलाई मृत्युदण्ड दिएको यो पहिलो घटना हो ।
कतारी नागरिक उमैर मोहम्मद उमैर अल रमाजानी अल–नुयमीको हत्या गरेको ठहर गर्दै चौधरीलाई मृत्युदण्डको फैसला सुनाइएको थियो । तल्लो अदालतको फैसलालाई सर्वोच्च अदालतले पनि अनुमोदन गरेपछि जेल प्रशासनले पिडीत परिवारले माफी दिन अस्वीकार गरेपछि मृत्युदण्डलाई कार्यान्वयन गरेको हो ।
मृत्युदण्डको कार्यान्वयन गर्नु एकदिन अगाडि मात्रै कतारले नेपाली दूतावासलाई जानकारी दिइएको थियो । सूचना पाएलगत्तै दूतावासले परराष्ट्र मन्त्रालयलाई मृत्युदण्डको कार्यान्वयन रोक्नका लागि पत्र पठाएको थियो ।
चौधरीले कतारी नागरिक अल नुएमीलाई खुकुरी प्रहार गरी हत्या गरिएको अदालतको फैसलामा उल्लेख छ । उनले नुएमीमाथि दर्जनौं पटक खुकुरी प्रहार गरेको उल्लेख छ । हत्या गरेको अभियोगमा उनलाई सन् २०१७ अप्रिलको पहिलो हप्ता पक्राउ परेका थिए ।
स्थानीय अस्पतालमा राखिएको अनिलको शवलाई नेपाल पठाउनको लागि कतारी प्रशासनले अनुमति दिएको छ । चौधरी २०१५ अगष्ट २७ गते कतार गएका थिए । उनी कार धुने कम्पनीमा सामान्य मजदुरको हैसियतमा काम गर्थे ।
यो विषयमा आफ्नो प्रतिक्रिया दिनुहोस् !