जनकपुरधाम, जेठ ७ गते । प्रदेश २ मा बिहीवार बिहानसम्म १ सय ३७ जनामा कोरोना संक्रमण पुष्टि भएको छ ।
बुधवार बेलुकासम्म ६ हजार ६ सय २३ जना व्यक्तिको थ्रोट स्वाब परिक्षण गरिएकोमा १ सय ३७ जना संक्रमित भएको स्वास्थ्य निर्देशनालयले जनाएको छ । स्वाब परिक्षण गरिएकाहरु मध्ये ५ हजार ८३ जनाको नेगेटिभ रिपोर्ट आएको छ भने १ हजार ४ सय ३ जनाको रिपोर्ट आउन बाँकी छ ।
त्यस्तै,आरडीटी परीक्षण तर्फ ५ हजार ८ सय २८ जनाको जाँच गरिएकोमा १२ जनाको पोजेटिभ र ५ हजार ८ सय १५ जनाको रिपोर्ट नेगेटिभ आएको छ ।
प्रदेशमा संक्रमित १ सय ३७ मध्ये सर्लाही घर भई काठमाण्डौ बस्ने ३४ बर्षिय पुरुषको काठमाण्डौस्थित शुक्रराज ट्रपिकल तथा सरुवा रोग अस्पतालमा उपचार भइरहेको छ भने रौतहटका ३४ बर्षिय र धनुषाका २८ बर्षिय पुरुष सहित दुई सुरक्षाकर्मीको हाल काठमाडौंमा उपचार भइरहेके सामाजिक विकास मन्त्रालयका सचिव डाक्टर रामप्रसाद घिमिरेले बताएका छन ।
संक्रमित मध्ये ९१ जना पर्साका,२२ जना रौतहटका, ४ जना बाराका, ८ जना धनुषाका, ४ जना महोत्तरीका, ६ जना सर्लाहीका, १÷१ जना सिरहा र सप्तरीका रहेका छन ।
पर्सा जिल्लामा पीसीआर परिक्षण मार्फत संक्रमण प्रमाणित भएका ६३ जना पुरुष र ८ जना महिला गरि कुल ७१ जनाको वीरगञ्जस्थित नारायणी उपक्षेत्रीय अस्पतालमा एवं १६ पुरुष र ८ महिला गरि कुल २४ जनाको वीरगञ्ज महानगरपालिकास्थित सिद्धार्थ स्कुल परिसरमा निर्माण गरिएको आईसोलेशन कक्षमा राखि उपचार भईरहेको छ ।
जनकपुरधामको प्रादेशिक अस्पताल अन्तर्गतको कोरोना विशेष अस्पतालको आईसोलेशन कक्षमा १ महिला र ९ पुरुष सहित उदयपुरका एकजना गरी कुल १० जनाको उपचार भइरहेको छ भने सप्तरीको राजविराजस्थित गजेन्द्र नारायण सिंह सगरमाथा अस्पतालमा एक र सिरहाको महेन्द्र गेनाई अस्पतालमा एक गरी २ जना र बाराको कोभिड विशेष अस्पतालमा २ जना संक्रमितको उपचार भइरहेको छ ।
त्यस्तै रौतहटका १ महिला र १७ पुरुष गरि १८ जना संक्रमितहरुको गौरस्थित गौर नर्सिङ्ग इन्स्टिच्युटको आईसोलेशन कक्षमा उपचार भइरहेको सचिव घिमिरेले बताए ।
प्रदेशका १ सय ३७ संक्रमित मध्ये २ जना उपचार पश्चात नीको भई घर फर्किसकेका छन् भने उपचाररत रहेका बाँकी सबैको स्वास्थ्य अबस्था सामान्य रहेको बताइएको छ ।
प्रदेशमा ७ हजार ३ सय ५६ बेड क्षमताको २ सय १२ वटा क्वारेन्टाइनमा हाल ४ हजार ७ सय ७ जनालाई निगरानीमा राखिएको छ भने ४ हजार ९ सय ६६ जना होम क्वारेन्टाइनमा छन् ।
यो विषयमा आफ्नो प्रतिक्रिया दिनुहोस् !