काठमाठौ, जेठ ६ गते । कोरोना आशंकामा रोल्पा अस्पतालको आइसोलेसनमा उपचारका लागि राखिएका एक युवकको मृत्यु भएको छ ।
आइतबार रातिदेखि आइसोलेसनमा राखिएका रोल्पा नगरपालिका १ का २२ वर्षीय युवकको सोमबार दिउँसो मृत्यु भएको हो ।
रोल्पा अस्पतालका अनुसार ती युवकलाई कोरोना संक्रमण थियो कि थिएन भन्ने निश्चित गर्न उनको स्वाब दाङको घोराहीस्थित राप्ती स्वास्थ्य विज्ञान प्रतिष्ठानमा पठाइएको छ । स्वाब परीक्षणको रिपोर्ट नआउंदै उनको मृत्यु भएको प्रतिष्ठानले जनाएको छ ।
मृतक लामो समयदेखि काठमाडौ बस्दै आएका थिए । मृगौला रोगबाट ग्रसित ती युवकलाई कोरोनाको लक्षण देखिएपछि उपचारका लागि रोलपा अस्पतालमा भर्ना गरिएको कुरा अस्पताल प्रमुखले जनाएको छ । आइसोलेशनमा राखेर जिल्ला अस्पतालमा उनको उपचार भइरहेको थियो ।
रोलपा नगरपालिकाका मेयर पुर्ण केसीका अनुसार दुवै मृगौला काम गर्न छाडेपछि एकडेढ वर्षदेखि काठमाडौको त्रिवि शिक्षण अस्पतालमा मृतकले उपचार गराइ रहेको थियो ।
लकडाउन भएपछि काठमाडौमा उपचारमा समस्या भएपछि उनको आग्रहमा हामीले लमही स्थित अस्पतालमा व्यवस्था गरेका थियौं तर काठमाडौबाट आउने बितिकै उनी बिमार भए, उपचारका लागि जिल्ला अस्पतालमा भर्ना गरियो र उपचारकै क्रममा उनको मृत्यु भएको मेयर केसीले बताए ।
यो विषयमा आफ्नो प्रतिक्रिया दिनुहोस् !