बुटवल, जेठ ५ गते । क्वारेन्टाईनमा बसेको हप्तौ बितिसक्दा पनि पीसीआर परीक्षण नभएको भन्दै त्यसमा बसेका व्यक्तिहरु भाग्न थालेका छन ।
कपिलवस्तुमा अहिलेसम्म १२ जना कोरोना भाइरस (कोभिड(१९) संक्रमित भेटिएकोमा जिल्लाको यशोधरा गाउँपालिकामा मात्र १२ सयभन्दा बढी नागरिक क्वारेन्टाइनमा छन् ।
भारतको मुम्बई, कानपुर लगायतका क्षेत्रबाट आएका उनीहरू क्वारेन्टाइनमा बसेको दुई साता हुन लाग्यो । तर, जम्मा ६२ जनाको मात्रै स्वाब परीक्षण भएको छ ।
६२ जनाको पीसीआर परीक्षण हुँदा १२ जनाको पोजेटिभ आयो सबैको परिक्षण गर्दा सयौंको संख्यामा संक्रमित हुन सक्ने भन्दै आ आफ्नो तत्काल परिक्षणको मांग गर्दै तिनीहरु भाग्न थालेको गाउँपालिका अध्यक्ष गिर्जेशकुमार पाण्डेले बताए ।
क्वारेन्टाइनमा बसेको लामो समय हुँदा पनि परीक्षण नभएपछि उनीहरू भाग्न थालेको गाउँपालिका अध्यक्ष पाण्डेले बताए । ‘आफ्नै पार्टीको सरकार छ, गाउँमा कोरोनाको भयावह अवस्था आइसक्यो । तर, प्रदेशका सांसदहरूले पनि पहल नगरेको गुनासो गरेका छन ।
परीक्षणका लागि किटको व्यवस्था गर्न उनले आइतबार सामाजिक विकासमन्त्री सुदर्शन बराललाई धेरै पटक पटक फोन लगाए, तर उठेन । त्यसपछि मुख्यमन्त्री शंकर पोखरेललाई फोन गर्दा एकदुई दिनमा व्यवस्था हुने आश्वासन पाएका छन् ।
गाउँपालिकाका २५ वटा क्वारेन्टाइनमा भारतबाट आएकाहरू छन् । उनीहरूको पीसीआर टेस्टका लागि एक हप्ता अघिदेखि नै जिल्ला स्वास्थ्य कार्यालयलाई अनुरोध गर्दा कहिले प्रदेश सरकार त कहिले केन्द्रबाट आज भोलिमा किट आउँदैछ भन्दै अल्झाएको गाउँपालिकाको स्वास्थ्य शाखा प्रमुख ज्योतिप्रकाश दुबेले गुनासो गरे ।
कोरोना परीक्षण गर्न ढिलाइ हुँदा क्वारेन्टाइनमा बसेकाहरू रातको समयमा भाग्न थालेका छन् । भागेकालाई प्रहरीले नियन्त्रणमा लिइसकेको बताए पनि अझै क्वारेन्टाइनमा आएका छैनन् ।
भागेकाहरूलाई प्रहरीले घरघर पुगेर नियन्त्रणमा लिइसकेका उनीहरू सबैलाई छुट्टै क्वारेन्टाइनमा राख्ने बताइएको छ ।
यो विषयमा आफ्नो प्रतिक्रिया दिनुहोस् !