सप्तरी, जेठ ३ गते । विपन्नलाई वितरण गर्ने राहत सामाग्री अनियमितता गरेको आरोप लगाउंदै सप्तरीमा एक वडाअध्यक्ष विरुद्ध स्थानीयले प्रदर्शन गरेका छन ।
सप्तरीको बोदे बरसाईन नगरपालिका १ का अध्यक्ष धिरेन्द्र यादवले विपन्नलाई बाँड्ने राहत सामग्री चोरेर बेचेको र अनियमितता गरेको आरोप स्थानियबासिहरुले लगाएका छन् ।
वडा कार्यालय घेराबन्दी गरेर कार्यालयमा तालाबन्दी गरी वडा अध्यक्ष चोर कुर्सी छोड भन्दै चर्को नाराबाजी गरेको स्थानीय युवा नेता धर्म देव साहले जानकारी दिएका छन ।
बैशाख २९ गते मनमौजी रुपमा राति ९ बजे आफन्त लगायत आफ्ना आसेपासेलाई सुटुक्क राहत दिएको व्यापक जनगुनासो रहेको छ । वैधानिक प्रक्रियालाई उल्लंघन गर्दै रातारात बाँडिएको राहतको बिषय लिएर धनगढी लगायत वडा १ मा पर्ने गाउँमा अध्यक्ष यादवको विरोध हुंदै आएको छ ।
अध्यक्षको मनपरी भन्दै स्थानीयले धिरेन्द्र यादवलाई कारबाहीको माग गरेका छन । साहले बोदे बरसाईन नगरपालिका का मेयर र प्रशासकिय अधिकृत समेतलाई जानकारी गराएको भनेका छन ।
नगरपालिकाले ४ सय प्याकेट राहत सामग्री पठाइएकोमा वडा अध्यक्षले कुनै पनि पार्टीको प्रतिनिधि नबोलाइ आफ्नो मनोमानी ढंगले वितरण गरेको आरोप छ । यसैबीच सो सम्बन्धमा नगरपालिकाका मेयरसग सम्पर्क गर्दा सम्पर्क हुन सकेको छैन ।
यो विषयमा आफ्नो प्रतिक्रिया दिनुहोस् !