जनकपुरधाम, वैशाख ३१ गते । समाजवादी पार्टी र राष्ट्रिय जनता पार्टीको एकीकृत जनता समाजवादी पार्टी (जसपा) को नेतृत्व व्यवस्थापन बारे छलफल सुरु भएको छ ।
एकीकरण भएको तीन हप्तापछि नेतृत्वमा को को बस्ने र वरियताको विषयमा छलफल भइरहेको छ । पहिलो वरियतामा महन्थ ठाकुरलाई राख्ने र ८ सदस्यीय निर्देशक समिति राख्ने विषयमा छलफल भइरहेको बुझिएको छ ।
एकीकृत पार्टीमा ८ जनाको निर्देशक समिति बनाउने विषयमा छलफल भइरहेको एक नेताले जानकारी दिए । यो समितिमा पार्टी एकीकरण गर्दा हस्ताक्षर गरेका नेताहरूलाई मात्रै रहने भनिएको छ ।
१० वैशाखमा पार्टी एकता सहमति पत्रमा राजपाबाट महन्थ ठाकुर, राजेन्द्र महतो, महेन्द्रराय यादव र शरदसिंह भण्डारी तथा सपाबाट डा. बाबुराम भट्टराई, उपेन्द्र यादव, अशोक राई र राजेन्द्र श्रेष्ठले हस्ताक्षर गरेका थिए ।
यसैबीच साविक राजपा अध्यक्ष मण्डलका सदस्य अनिल झाले भने निर्देशक समितिमा आफूलाई राख्न माग गरेका छन् । राजपाका अध्यक्ष मण्डलका ६ सदस्य मध्ये दुईजना पार्टी एकीकरण बैठकमा सहभागी थिएनन् । त्यतिबेला बैठकमा उपस्थित नभएका अनिलकुमार झा, राजकिशोर यादवलाई समेट्ने गरी १७ सदस्य सचिवालय बनाइने विषयमा छलफल भइरहेको तात्कलिन राजपा श्रोतले जनाएको छ ।
सचिवालयमा आफ्नो पार्टीबाट ९ र राजपाबाट ८ जना राख्नुपर्ने सपाले माग गरेको छ । राजपाले यो प्रस्ताव मान्दा सपाबाट एकीकरणमा हस्ताक्षर गरेका चारजना र नवराज सुवेदी, परशुराम खापुङ्ग, युवराज कार्की, रकम चेम्जोङ र रेणुकुमारी यादव वा प्रदेश २ का मुख्यमन्त्री लालबाबु राउत सचिवालयमा पुग्ने देखिन्छ ।
राजपाले भने आफ्नो पार्टीबाट ९ र सपाबाट ८ सदस्य पठाउनु पर्ने मत राखेको छ । राजपाले ९ सदस्य पाउँदा महन्थ ठाकुर, राजेन्द्र महतो, महेन्द्रराय यादव, शरदसिंह भण्डारी, लक्ष्मणलाल कर्ण, अनिल झा, सवेन्द्रनाथ शुक्ल, राजकिशोर यादव र वृषेशचन्द्र लाल सचिवालयमा पुग्ने सम्भावना छ ।
५१ सदस्यीय केन्द्रीय कार्यकारिणी समिति र १२५ सदस्यीय केन्द्रीय समिति बनाउनुपर्ने सपाको प्रस्ताव छ । यस्तो अवस्थामा केन्द्रीय कार्यकारिणी २६ र केन्द्रीय समितिमा ६३ जना आफ्नो पार्टीको हुनुपर्ने सपाको माग छ ।
राजपा र सपा दुबै स्रोतहरूका अनुसार पार्टीको पहिलो वरीयतामा महन्थ ठाकुर रहने यसअघि नै सहमति भइसकेको छ । उनको पद के हुने र ‘सेरेमोनियल’ बनाउने कि कार्यकारी भूमिकामा राख्ने भन्ने कुरा मिल्न बाँकी रहेको राजपा श्रोतको भनाई छ ।
तर सपा श्रोतका अनुसार सपमा नयाँ शक्तिबाट आएका केही नेताहरू भने बाबुराम भट्टराईलाई पहिलो वरीयतामा राख्न माग गरेका छन् । भट्टराई दोस्रो र उपेन्द्र यादव तेस्रोमा वरीयतामा रहनेमा खासै विवाद देखिँदैन ।
वरीयताको चौथो नम्बरमा राजेन्द्र महतो, पाँचौमा अशोक राई, छैठौंमा महेन्द्रराय यादव, सातौंमा शरदसिह भण्डारी र आठौंमा राजेन्द्र श्रेष्ठ रहने गरी छलफल भइरहेको छ ।
यो विषयमा आफ्नो प्रतिक्रिया दिनुहोस् !