काठमाडौ, वैशाख २८ गते । कोरोना भाइरस रोकथामका लागि जार लकडाउनका कारण समस्यामा परेकालाई आगामी दिनमा राहत सामग्री होइन, रोजगारी दिने निर्णय उपत्यका नगरपालिका फोरमले गरेको छ ।
विश्वभरी महामारीको रुपमा फैलिएको कोभिड–१९ को संक्रमणलाई नियन्त्रणका लागि सरकरले गत चैत ११ गतेदेखि नै लकडाउन गरेको कारण मार्कामा परेका श्रमिक वर्गको समस्या समाधानका लागि फोरमले लकडाउनको पालना गर्दै राहत होइन रोजगार दिने निर्णय गरिएको फोरमले जनाएकोछ ।
संघीय सरकारले जारी गरेको लकडाउनलाई पालना गर्दै सक्षम जनशक्तिलाई श्रम र रोजगारीसँग जोड्दै अर्थतन्त्रलाई चलायमान बनाउने उद्देश्यले यस्तो निर्णय काठमाडौँ उपत्यकाका दुई महानगर र १६ नगरपालिकाका प्रमुख–उपप्रमुखहरुको साझा संस्था नगरपालिका फोरमको बैठकले गरेको हो ।
नगरपालिका फोरमका अध्यक्ष समेत रहेका काठमाडौँ महानगरपालिकाका प्रमुख विद्यासुन्दर शाक्यले भने, “पछिल्लो समय संघीय सरकारले लकडाउन केही खुकुलो बनाउने निर्णय गरेको छ सोही निर्णयलाई आधार मानेर राहत वितरणलाई भन्दा पनि परिश्रम अनुसारको र पारिश्रमिक प्रदान गरी सहयोग गर्ने फोरमले निर्णय गरेको हो ।
प्रमुख शाक्यले नेपाल सरकारले २०७७ वैशाख २६ गतेबाट लागू हुने गरी अत्यावश्यक उद्योग सञ्चालन गर्ने निर्णय गरेको भन्दै ती क्षेत्रहरु सञ्चालनमा सहजीकरण गर्दै लकडाउनलाई पालन गर्ने–गराउने निर्णय पनि बैठकमा भएको जानकारी दिए ।
केही दिनअघि मात्रै नगरपालिका फोरमका पदाधिकारीले कोभिड–१९ सम्बन्धी उच्चस्तरीय समन्वय समितिका संयोजकसमेत रहेका उपप्रधान एवं रक्षामन्त्री ईश्वर पोखरेलसँग भेट गरी उपत्यकाभित्र निर्वाध भित्रने कार्यलाई कडाइ गरी उपत्यकाभित्र भने लकडाउन केही खुकुलो बनाउनुपर्ने माग गरेको थियो । शनिबार बसेको फोरमको बैठकले यस किसिमको निर्णय गरेको हो ।
भक्तपुरका स्थानीय तहमा काम लगाउने र सोही अनुसारको पारिश्रमिक दिने कार्य शुरु गरिसकेको छ । लकडाउनका कारण धेरै कामहरु स्थगित गर्नुपरेको छ ती काम पनि सञ्चालन गर्ने र श्रमिकलाई आर्थिक सहयोग पनि गर्ने गरी यस किसिमको योजना तयार गरिएको हो ।
यो विषयमा आफ्नो प्रतिक्रिया दिनुहोस् !