जनकपुरधाम, वैशाख १८ गते । अपहरण घटनामा प्रहरी र सरकारी वकिल कार्यालयले मुद्दा दर्ता नगरेपछि जनता समाजवादीका सांसद डा. सुरेन्द्र यादवले राष्ट्रिय मानव अधिकार आयोगमा निवेदन दर्ता गराएका छन् ।
सत्तारूढ नेपाल कम्युनिष्ट पार्टी नेकपाका सांसदद्वय महेश बस्नेत, कृष्णकुमार श्रेष्ठ किसन र पूर्वआइजिपी सर्वेन्द्र खनालविरूद्ध सांसद डा. यादवले बिहीबार मानव अधिकार आयोगमा निवेदन दर्ता गराएका हुन ।
आफूलाई महोत्तरीबाट अपहरण गरी काठमाडौं ल्याएको भन्दै उनले यसअघि महानगरीय प्रहरी परिसर, सरकारी वकिल कार्यालय काठमाडौंमा किटानी जाहेरी दर्ता गराउन गएका थिए । तर दुबै ठाउँमा जाहेरी दर्ता नभएपछि बिहीबार पुल्चोकस्थित मानव अधिकार आयोग पुगेर सांसद यादवले आफूलाई अपहरण गरेको भन्दै निवदेन दिएको बताएका छन ।
निवेदनमा उनले सत्ता र शक्तिका आडमा आफुलाई ज्यान लिन सक्ने अझै पनि जोखिम रहेकाले सांसदद्वय बस्नेत र श्रेष्ठ तथा पूर्वआइजिपी खनाललाई पक्राउ गरी आवश्यक छानबिन र कारबाही गर्न माग गरेको उल्लेख गरेका छन् ।
एकसाता अघि समाजवादी पार्टी फुटाउन भन्दै नेकपाका सांसदद्वय बस्नेत, श्रेष्ठ र पूर्वआइजिपी खनालले सांसद यादव उनको आफ्नै घरबाट अपहरण शैलीमा काठमाडौं पुरयाएका थिए ।
यो विषयमा आफ्नो प्रतिक्रिया दिनुहोस् !