जनकपुरधाम, वैशाख १७ गते । जनकपुरधाम उपमहानगरपालिकाले वडा नम्बर १६ मा राहत स्वरुप वितरण गरेको चामललाई खाद्य प्रविधि तथा गुण नियन्त्रण कार्यालय जनकपुरले गुणस्तरीय रहेको दाबी गरेको छ ।
गत दुई दिनअघि वडा नम्बर १६ कपिलेश्वरमा वितरण गरिएको चामल कुहिएको र ढुंसी लागेको गुणस्तरहीन रहेको पाइएको थियो । सो कुरालाई विभिन्न संचार माध्यमले समाचार सम्प्रेषण गरेपछि बुधवार खाद्य प्रविधि तथा गुण नियन्त्रण कार्यालयले परिक्षणमा गुणस्तरयुक्त रहेको दाबी गरेका हुन ।
खाद्य प्रविधि तथा गुण नियन्त्रण कार्यालयले उपमहानरपालिकासँगको मिलोमतोमा ढुसीं सहित फेला पारेको चामलको परिक्षण नगरी गोदाममा राखिएका चामलको अन्य १० पैकेट लगेर त्यसको चेकजाँच गरी गुणस्तर प्रमाणित गरेको हो ।
स्थानीय बुद्धिजीवीहरुले उपमहानगरपालिकाले आफ्नो गलती लुकाउन खाद्य प्रविधि तथा गुण नियन्त्रण कार्यालयलाई प्रभावमा पारी वितरण गरिएका ढुसीं सहितको चामल चेकजाँचका लागि नदिई गोदाममा रहेका राम्रो चामलको प्याकेट दिएर गुणस्तरीयता प्रमाणित गराई जनतालाई झुक्याउन खोजेको आरोप लगाएका छन ।
वडा नम्बर १६ मा वितरित ढुसी सहितको गुणस्तरहीन चामल उपमहानगरपालिकाले लुकाई राम्रो चामल मात्रै चेक गराउनुको अर्थ उपमहानगरपालिकाले आफ्नो टाउको ठाडो गर्न खोजेको स्थानीय जनताको बुझाई छ । स्थानीय जनताले घटनाको छानबीनको मांग समेत सम्बन्धित निकायसँग गरेको छ ।
उपमहानगरपालिकाले गुणस्तरहीन चामल वितरण गरेको हल्ला भएपछि वडाध्यक्ष रामआशिष पजियारले कुहिएको र ढुसी लागेको सो चामल फिर्ता लिई पिडीतलाई अर्को चामलको प्याकेट दिएको कुरा लोकपुकार सँग कुरा गर्दै बताएका थिए ।
उनले भनेका थिए सिल पैकेट चामल छ भित्र के थियो आफूलाई थाहा छैन, तर पिडीतलाई सो चामल फिर्ता लिई अर्को प्याकेट दिएर पठाएका छौं ।
यता समाचार सम्प्रेषण भएको भोली पल्ट खाद्यान्न वितरण समितिका संयोजक उपमेयर रीता मिश्रले चलाखी गर्दै खाद्य प्रविधि तथा गुण नियन्त्रण कार्यालयलाई कुहिएको चामलको पैकेट चेकजाँचका लागि नदिई गोदामबाट राम्रो खाले चामलको १० वटा पैकेट चेकजाँचका लागि दिएर पठाएका थिए ।
यसैबीच जिल्ला प्रशासन कार्यालयबाट खटिएका प्रतिनिधिले चामल बदलिएको देखिएमा वा बदनाम गर्ने नियतले त्यस्तो गरेको पाइएमा कानून अनुसार कारवाही हुने बताएका छन् ।
जनकपुरधाम उपमहानगरपालिकाले पहिलो चरणमा १२ वटा वडाका ७ हजार ६ सय परिवारका लागि राहत पठाएको छ । वडा नम्बर २, ३, ४, ५, ६, , ११, १४,१६, १७, १ र २१ मा राहत पठाइएको हो ।
यो विषयमा आफ्नो प्रतिक्रिया दिनुहोस् !