जनकपरधाम, वैशाख १५ गते । कोरोना भाइरसविरुद्ध लड्न प्रदेश २ सरकारको तयारी अपुग देखिएको छ ।
कोरोना संक्रमितको उपचार गर्ने भनिएका अस्पताल र प्रयोगशालाहरुको कमीको कारण तयारीमा सुस्त गति देखिएको छ । प्रदेश २ मा अस्पताल र प्रयोगशालाको आभाव मात्रै होइन संचालितहरुमा समेत स्वास्थ्य सामाग्री र जनशक्तिको आभाव रहेको छ ।
प्रदेश सरकारले प्रदेशका प्रादेशिक अस्पताल जनकपुर, महोत्तरीको जलेश्वर र बाराको कलैयामा कोभिड उपचार अस्पताल निर्माण गर्ने घोषणा गरेको महिनादिन बितिसक्दा पनि हालसम्म निर्माण हुन सकेको छ ।
प्रादेशिक अस्पतालमा निर्माण क्रम शुरु गरिएपनि हालसम्म कति समय लाग्ने कुनै निश्चित छैन भने जलेश्वर र कलैयामा अहिलेसम्म निर्माणको कुनै छाँटकाट देखिएको छैन । जलेश्वरमा गम्भीर शंकास्पद देखिए प्रादेशिक अस्पताल र कलैयामा फेला पर्दा विरगंज स्थित नारायण क्षेत्रिय अस्पताललाई उपचारका लागि पठाउने गरिएको छ ।
हाल धनुषाको जनकपुरधामस्थित प्रादेशिक अस्पताललाई र पर्साको वीरगञ्जस्थित नारायणी अस्पताललाई कोरोना संक्रमितको उपचार गर्ने अस्पताल भनेर तोकिएको छ । जनकपुरमा काम अत्यन्त सुस्त गतिमा चलिरहेको छ ।
प्रदेश २ मा उपचारका लागि अस्पतालको आभाव मात्रै होइन कि पीसीआर परिक्षणका लागि प्रयोगशालाको उतिकै आभाव रहेको छ । केही दिनअघिसम्म प्रादेशिक अस्पतालमा मात्रै पीसीआर परिक्षण हुँदै आएको थियो । तर हाल जनकपुरमा चिनियाँ मेसिनले काम नगरिरहेको भनी बन्द भएपछि वीरगंजमा मात्र परिक्षण भइरहेको छ ।
प्रदेशका ८ वटै जिल्ला अस्पतालबाट स्वाब संकलन गरी वीरगंजको भर मात्र रहेको छ । हुनत प्रदेश सरकारले जनकपुर र वीरगंज बाहेक राजविराज स्थित गजेन्द्रनारायण सिंह अंचल अस्पतालमा समेत प्रयोगशाला निर्माण गर्ने भनेको थियो तर हालसम्म संचालन त के मेसिन पनि आएको छैन ।
लोकपुरकार सँग कुरा गर्दै स्वास्थ्य निर्देशनालयका सह निर्देशक डा. विजय झाले भने कोरोना भाइरसको उपचारका लागि जुन रुपमा तयारी हुनुपर्ने थियो त्यो रुपमा हुन सकेको देखिएको छैन ।
अहिले मात्र वीरगंजमा प्रयोगशाला छ, कोभिड अस्पताल निर्माण कलैया, जलेश्वर र जनकपुरमा भनिएपनि हालसम्म जनकपुरमा निर्माण भइरहेको छ तर कति समय लाग्ने निश्चित छैन ।
अहिले कुनै संक्रमित फेला पर्दा वीरगंजको नै भर छ, पछिल्लो पटक सर्लाहीमा संक्रमित भेटदा वीरगंज नै उपचारका लागि पठाउनु परयो । मैले बुझेसम्म हाल प्रादेशिक अस्पतालबाट संकलन गरिएका स्वाब वीरगंज, धरान र काठमाडौ पठाइने गरिएको छ ।
त्यस्तै प्रादेशिक अस्पताल जनकपुरधामका मेडिकल सुपरिडेन्ट डा. नागेन्द्र यादवले प्रदेश सरकारबाट अस्पताल अन्तर्गत रहेको नर्सिंग क्याम्पसमा कोभिड अस्पताल निर्माण भइरहेको छ तर लकडाउनले गर्दा सामान र जनशक्तिको आभावमा निर्माण हुन कति समय लाग्ने निश्चित नरहेको बताए ।
ल्याब बन्द भएपछि अहिले स्वाब परिक्षणको जिज्ञासा बारे उनले यो मेरो फाँट पनि होइन तर मैले बुझेसम्म स्वाब संकलन गरी वीरगंज नै पठाइने गरिएको छ । प्रादेशिक अस्पतालमा गुणस्तरीय मेसिन नआएसम्म वीरगंजकै भर हो ।
प्रयोगशाला र परिक्षण सम्बन्धमा जानकारी लिन खोज्दा प्रादेशिक प्रयोगशालाका प्रमुख रामविनय साहलाई पटक पटक सम्पर्क गर्दा पनि फोन रिसिभ गरेन ।
पछिल्लो पटक सर्लाहीको एक १४ वर्षिय किशोरको रिपोर्ट प्रादेशिक ल्याबमा निगेटिभ र राष्ट्रिय जनस्वास्थ्य प्रयोगशालामा पोजेटिभ आएपछि, प्रादेशिक ल्याबका प्राविधिकहरुले मेसिन नै गुणस्तरहीन रहेको कारण यस्तो अवस्था आएको भन्दै पीसीआर परिक्षण नै बन्द गरे । चिनियाँ गुणस्तरहीन मेसिन भएको कारण निगेटिभ बाहेक अरु रिपोर्ट नआउने गरेको दाबी छ ।
यता स्थानीय बुद्धिजीवी एवं राजनीतिकर्मीहरुले मुख्यमन्त्री लालबाबु राउतले आफ्नो गृह जिल्लालाई ग्राहयतामा राखेको कारण वीरगंजमा गुणस्तरीय ठूलो मेसिन पठाएको र जनकपुरमा प्रादेशिक अस्पताल हुँदाहुँदै गुणस्तरहीन सानो खाले मेसिन जडान गराएको आरोप लगाएका छन ।
उनीहरुले जनकपुरधामलाई कमजोर र वीरगंजलाई मजबूत पार्ने हिसाबले मुख्यमन्त्री राउतले यस्तो रणनीती अपनाएको आरोप समेत लगाएका छन ।
यी सबै अवस्थाहरु हेर्दा कोरोनाविरुद्धको लडाइँमा प्रदेश २ सरकार पर्याप्त तयारीमा नरहेको जनकपुरधाम स्थित चिकित्सकहरुको भनाई छ ।
यो विषयमा आफ्नो प्रतिक्रिया दिनुहोस् !