वीरगञ्ज, वैशाख १५ गते । वीरगञ्जमा कोरोना संक्रमितको सम्पर्कमा आएका ३३ जनाको पीसीआर परीक्षणका लागि थ्रोट स्वाबको नमुना संकलन गरिएको छ ।
वीरगञ्ज महानगरपालिका ३ छपकैया निवासी एकजना सफाइकर्मीमा आइतबार कोभिड–१९ संक्रमण पुष्टि भएसँगै ट्राभल हिष्ट्रीको आधारमा कन्ट्याक्ट ट्रेसिङ सुरु गरिएको हो । सोही क्रममा तिनीहरुको स्वाव संकलन गरिएको हो ।
पहिलो चरणमा प्रत्यक्ष सम्पर्कमा रहेका परिवारका सदस्यसहित ३३ जनाको थ्रोट स्वाबको नमुना संकलन गरिएको जिल्ला जनस्वास्थ्य कार्यालय पर्साले जनाएको छ । वडा नं ३ छपकैयाका संक्रमितको परिवारका सदस्य ७ जना, वडाका जनप्रतिनिधिसहित ३३ जनाको थ्रोट स्वाबको नमुना संकलन गरिएको जनस्वास्थ्य निरीक्षक जयमोद ठाकुरले जानकारी दिएका छन ।
‘कोभिड–१९ संक्रमणको पुष्टि भए लगत्तै परिवारका सदस्यलाई होम क्वारेन्टाइनमा बस्न भनिएको थियो । ट्राभल हिष्ट्रीका आधारमा प्रत्यक्ष सम्पर्कमा रहेकाहरुको थ्रोट स्वाबको नमुना संकलन गरेर परीक्षणका लागि पठाइएको भन्दै उनले अबेर साँझसम्म स्वास्थ्यकर्मी साथीहरुले खटेर थ्रोट स्वाबको नमुना संकलन गरेका हुन ।
कन्ट्याक्ट ट्रेसिङको कामलाई सोमबार पनि निरन्तरता दिइइको बताउंदै उनले वीरगञ्ज–१६ का संक्रमित व्यक्तिसँग प्रत्यक्ष सम्पर्कमा आएका व्यक्तिहरुको पहिचान भइसकेको बताए ।
जिल्ला प्रशासन कार्यालय पर्साका अनुसार पर्सामा हाल सर्लाहीका एक सहित तीन जना संक्रमित वीरगञ्ज स्थित नारायणी अस्पतालको आइसोलेसनमा छन् ।
जिप्रका पर्साले जनाए अनुसार १ सय १९ जना महिलासहित ३ सय २१ जना होम क्वारेन्टाइनमा, १० महिलासहित १ सय १४ जना जिल्लाका विभिन्न क्वारेन्टाइनमा राखिएका छन् । ठाकुरराम बहुमुखी क्याम्पसमा ४ जना महिलासहित १ सय २१ जना अलपत्र भारतीय नागरिकलाई राखिएको छ ।
यो विषयमा आफ्नो प्रतिक्रिया दिनुहोस् !