जनकपुरधाम, वैशाख १३ गते । लकडाउनको कारण अलपत्रमा परेकाहरुलाई काठमाडौंबाट उदयपुर लगिरहेको एक यात्रुवाहक बस दुर्घटना हुँदा एकजनाको मृत्यु भएको छ भने एकजना गम्भीर घाइते भएका छन ।
प्रहरीका अनुसार काठमाडौबाट उदयपुर गइरहेको बा ३ ख ४०३६ नम्बरको यात्रुवहाक बस महोत्तरीको बर्दिवासमा दुर्घटना हुँदा सह–चालकको मृत्यु भएको छ भने एक जना गम्भीर घाइते भएको हो ।
शुक्रबार राति १० बजे ३५ जना यात्रुलाई काठमाडौंबाट लिएर उदयपुरको लागि छुटेको बस बर्दिबास नगरपालिका –३ स्थित पाटुमा शनिवार दुर्घटनामा परेको इलाका प्रहरी कार्यालय बर्दिबासका इन्स्पेक्टर सोनुकुमार साहले जानकारी दिएका छन ।
बस पल्टिन लागेपछि ढोका खोलेर हामफाल्न खोज्दा बसको हुडले किचिएर सह–चालक दोलखाको तामाकोसी –२ का बाबुराम विश्वकर्माको घटनास्थलमा मृत्यु भएको इन्स्पेक्टर साहले बताए ।
त्यसैगरी दोलखाकै तामाकोसी–२ का २२ वर्षीय प्रदीप विश्वकर्मा गम्भीर घाइते भएका छन् ।
उनको बर्दिबासस्थित शुभ स्वस्तिक हस्पिटलमा उपचार भइरहेको प्रहरीले जनाएको छ ।
उदयपुरको चौडण्डी नगरपालिकाले लकडाउनमा अलपत्र परेका आफ्ना नगरभरीका स्थानीयलाई बस व्यवस्थापन गरेर ल्याउँदै गरेको बस शनिवार बिहान चार बजे दुर्घटनामा परेको हो ।
गाउँ नजिकै बस दुर्घटना परेको सूचना पाएपछि पुगेका स्थानीयहरुले बसका यात्रुहरुको उद्धार गरेका थिए । भने दुर्घटना लगत्तै बसका चालक फरार भएको प्रहरीले जनाएको छ ।
यो विषयमा आफ्नो प्रतिक्रिया दिनुहोस् !