जनकपुरधाम, वैशाख ७ गते । प्रदेश २ सरकारले प्रदेशस्थित सुरक्षा निकायहरूको सरुवा गर्दा सहमति लिनुपर्ने भन्दै गृह मन्त्रालयलाई आग्रह गरेको छ ।
प्रदेशको शान्ति सुरक्षामा खटिएका प्रमुखहरुको सरुवा, पदस्थापना, काज र खटनपटन गर्दा प्रदेश सरकारको सहमतिमा लिएर मात्रै गर्न आन्तरिक मामिला तथा कानुन मन्त्रालयले संघीय सरकारलाई पत्र पठाएर आग्रह गरेको हो ।
कोरोना भाइरस (कोभिड–१९) को महामारीको बेला सुरक्षा निकायका प्रमुखहरूलाई नचलाउन प्रदेश सरकारले लेखेको पत्रमा भनिएको छ । हाल प्रदेश २ मा कार्यरत तीन डिआइजी, केही सिडिओ र एसपीको सरुवाको तयारी गृह मन्त्रालयले गरिरहेको थाहा पाएपछि प्रदेशले पत्र मार्फत औपचारिक रुपमा आग्रह गरेको हो ।
कोभिड १९ विरुद्धको लडाइँका लागि प्रदेशमा सञ्चालन तथा व्यवस्थापन भइरहेको प्रवद्र्धनात्मक, निरोधात्मक र उपचारात्मक अभियानमा सुरक्षा निकायको व्यापक सहयोग र सहकार्य रहेकाले गृह मन्त्रालय तथा अन्तर्गतका निकायबाट डिआइजी, सिडिओ र एसपीलाई प्रदेश वा अन्तर्गतको जिल्लामा सरुवा, पदस्थापन, काज वा खटनपटन गर्दा सहमति लिन प्रदेश सरकारले शुक्रवार गृह मन्त्रालयलाई लेखेको पत्रमा उल्लेख छ ।
प्रधानमन्त्री तथा मन्त्रिपरिषद् कार्यालय, गृह सचिव तथा नेपाल प्रहरी, सशस्त्र प्रहरी र राष्ट्रिय अनुसन्धान विभाग प्रमुखलाई बोधार्थसहित आन्तरिक मामिला तथा कानुन मन्त्रालयले गृह मन्त्रालयले सो पत्र गृहलाई पत्र पठाएको छ ।
प्रदेश वा अन्तर्गतका जिल्लामा सरुवा हुने डिआइजी, एसपी र सिडिओको बारेमा प्रदेश सरकारलाई अग्रिम जानकारी हुनुपर्ने र प्रदेश सरकारले त्यो नाममा सहमति जनाए मात्र सरुवा गर्नुपर्ने सर्त प्रदेश सरकारले यसअघि नै राखिसकेको छ ।
यो विषयमा आफ्नो प्रतिक्रिया दिनुहोस् !