जनकपुरधाम, वैशाख ३ गते । धनुषाको हंसपुर नगरपालिका स्थित क्वारेन्टाईनमा बस्नेहरुको संख्या ७ पुगेको छ ।
यसअघि ९ जना रहेको थियो, ती मध्ये केही निको भई घर फर्केका छन भने मंगलवार मात्रै ३ जना थपिएको हो । मंगलवार थपिएका मध्ये मुस्लिम समुदाय परिवारका रहेको बताइएको छ ।
मंगलवार ३ जना मध्ये एकजना भारत बिहार राज्यका बेतिया जिल्लाका पर्सा ग्राम निवासी अफताब अन्सारी रहेका छन । बघचौरामा ससुराली आएका अन्सारीलाई स्थानीयले भारतबाट आएको भनी दबाव दिएपछि प्रहरीको सहयोगमा क्वारेन्टाईनमा राखिएको हो ।
अन्सारीमा कोरोना भाइरस संक्रमणको कुनै लक्षण नदेखिएपनि स्थानीयले भारतबाट आएको हो, यसलाई क्वारेन्टाईनमा राख्नुपर्छ भन्ने दबाव पश्चात यहाँ राखिएको क्वारेन्टाईनका बुधेश्वर यादवले बताए ।
त्यस्तै मंगलवार राति हंसपुर ५ बेल्हीका अब्दुल हुसैन र उनका श्रीमतिलाई क्वारेन्टाईनमा निगरानीका लागि ल्याइएको यादवले जानकारी दिदैं हाल सो क्वारेन्टाईनमा ७ जना चिकित्सकको प्रत्यक्ष निगरानीमा रहेको बताए ।
हंसपुर नगरपालिका ७ नौवाखोरमा २५ बेड व्यवस्था सहितको रहेको सो क्वारेन्टाईन सुरक्षा र स्वास्थ्यको पुर्ण व्यवस्थित रहेको मेयर रामज्ञान मण्डलले बताएका छन ।
उनले भने नेपाल सरकारको मापदण्ड अनुसार निर्मित सो क्वारेन्टाईनमा हाल करीब ७० पीस पिपिई, थर्मन गन लगायत सम्पूर्ण चेकजाँच र सुरक्षा सहितका उपकरण सामग्री र क्वारेन्टाईनमा बस्नेहरुका लागि खाने बस्ने लगायतका सम्पूर्ण व्यवस्था पालिकाबाटै गरिएको छ ।
सो क्वारेन्टाईनमा एक एमबीबीएस चिकित्सक सहित पालिकाभित्र रहेका स्वास्थ्य चौकीहरुमा कार्यरत स्वास्थ्यकर्मीको सिफ्टवाईज चौबिसो घण्टा डियूटीमा खटाइएको छ । क्वारेन्टाईनका साथै स्वास्थ्य चौकीहरुमा पनि चौबिसो घण्टा बिरामी चेकजाँच गर्ने व्यवस्था मिलाइएको मेयर मण्डलले जानकारी दिए ।
चाँडै राहत वितरण
कोरोना भाइरस रोकथाम नियन्त्रणका लागि जारी लकडाउनमा मार्कामा परेका खान नपुगेका गरीब, दलित, असहाय र दैनिक ज्यालादारीमा काम गर्ने परिवारहरुलाई चाँडै नै खाद्यान्न राहत वितरण गरिने जानकारी समेत मेयर मण्डलले दिएका छन ।
उनले भने प्रत्येक वडाबाट नामावली संकलन भइसकेको छ, वडाहरुमा समिति पनि गठन भइसकेको छ र प्रदेश सरकारले तोकेको मापदण्ड अनुसार मार्कामा परेका परिवारलाई वडाबाटै राहत वितरण गरिने प्रक्रिया अघि बढाइ सकिएको छ ।
प्रदेश सरकारले पठाएको १५ लाख रुपैया प्रत्येक वडामा २ लाखको दरले पठाइसकिएको छ । तर पालिकाभरिमा २५÷२७ सयको हाराहारीमा मार्कामा परेका गरीब परिवार छन, सो रकमले पुग्ने सम्भावना देखिदैन रकम अपुग भएपछि पालिकाको कोष र विभिन्न शिर्षकबाट सो रकम व्यवस्था गरिने उनले बताए ।
यसका अतिरिक्त पालिकालाई कोरोना भाइरस मुक्त बनाउन लामखुट्टे औषधि छिर्काउ र सेनिटाइज्ड गर्ने काम पनि जारी रहेको छ भने आम जनतामा सचेतना र सतर्ककताका लागि वडाहरुमा पर्चा पम्पलेट र माइकिंग मार्फत प्रचार प्रसार पनि शुरुदेखि जारी रहेको मेयर मण्डलले बताए ।
उनले विदेश वा संक्रमित क्षेत्रबाट आएका व्यक्तिहरुको खोजी कार्य पनि वडामा तिव्र रुपमा भइरहेको छ भने प्रत्येक घर घरमा गई स्वास्थ्यकर्मीहरुले ज्वरो सहित कोरोना लक्षणका चेकजाँच पनि नियमित रुपमा भइरहेको जानकारी दिए ।
यो विषयमा आफ्नो प्रतिक्रिया दिनुहोस् !