जनकपुरधाम, वैशाख ३ गते । प्रदेशमा कोरोना भाइरस संक्रमितको संख्या थपिदै गएको छ ।
यसैक्रममा बुधवार प्रदेशका सप्तरी जिल्लामा गरिएको रैपिड परिक्षणमा दुईजना स्थानीयको रिपोर्ट पोजेटिभ देखाएको छ ।
दिल्लीबाट फर्केर घरमा बसिरहेका ८ जनालाई प्रहरीको टोलीले मंगलबार राजविराजस्थित गजेन्द्रनारायण सिंह अस्पताल ल्याएर रैपिड गराउंदा २ जनाको रिपोर्ट पोजेटिभ र ५ जनाको निगेटिभ रिपोर्ट आएको छ भने एकजनाको रिपोर्ट आउन बाँकी रहेको छ ।
दुई जनाको पोजेटिभ र ५ जनाको नेगेटिभ रिपोर्ट आएको अस्पतालका मेडिकल सुपरिटेन्डेन्ट डा.चुमनलाल दासले जानकारी दिएका । उनका अनुसार पोजेटिभ र नेगेटिभ दुबै रिपोर्ट आएका ७ जनाको स्वाब संकलनका लागि प्रयोगशाला परीक्षण गर्न बीपी कोइराला स्वास्थ्य विज्ञान प्रतिष्ठान धरान पठाइ सकिएको छ ।
दिल्लीबाट आएर घरमा बसेको सूचना पाएपछि प्रहरीको टोलीले खड्क र राजविराज नगरपालिका, तिलाठी कोइलाडी, अग्निसाइर कृष्णासावरण गाउँपालिकाका ७ जनालाई अस्पताल ल्याएर रैपिड जाँच गरिएको थियो ।
यता रिपोर्ट पोजेटिभ देखिएपछि सप्तरीका २ स्थानीय तहका २ वडालाई सिल गरिएको छ । जिल्ला सुरक्षा समितिको बैठकले खड्क नगरपालिकाको वडा नं.११ र तिलाठी कोइलाडी गाउँपालिकाको वडा नं.१ लाई सिल गर्ने निर्णय गरेको हो । यहाँका स्थानीय तहका व्यक्ति घर बाहिर अथवा भित्र जान सक्दैनन् ।
प्रशासकीय अधिकृत आनन्द ठाकुरले यी दुबै वडाका १/१ व्यक्तिमा रैपिड परीक्षणका क्रममा पोजेटिभ देखिएपछि दुबैलाई सिल गर्ने निर्णय गरिएको जानकारी दिए । साथै उनले पोजेटिभ देखिएकाको पारिवारिको सदस्यको समेत रैपिड टेष्ट गरिने तथा संक्रमितको कन्ट्याक्ट ट्रेसिङ गर्ने निर्णय भएको बताए ।
यो विषयमा आफ्नो प्रतिक्रिया दिनुहोस् !