जनकपुरधाम, वैशाख ३ गते । कोरोना भाइरस रोकथाम एवं नियन्त्रणका लागि जारी लकडाउनको असर ब्लड बैंकमा पनि परेको छ ।
लकडाउनका कारण जनकपुरधाम स्थित नेपाल रेडक्रस सोसाइटी धनुषाको ब्लड बैंकमा रगतको आभाव भएको छ । रगतको अभाव भएपछि नेपाल रेडक्रस सोसाइटीले स्वेच्छिक रक्तदानका लागि आग्रह गरेको छ ।
सरकारले कोरोना भाइरसको संक्रमण रोकथाम र नियन्त्रणका लागि लकडाउन गरेपछि रक्तदान समेत ठप्प भई रगतको आभाव हुन गएको नेपाल रेडक्रस सोसाइटी धनुषाका अध्यक्ष नरेश प्रसाद सिंहले बताएका छन ।
उनले तत्काल रक्तदानका लागि अभियान सञ्चालन नगरिए त्यहाँ रगतको चरम अभाव हुन सक्ने चिन्ता समेत व्यक्त गरेका छन् । यस्तो अवस्थामा रगतको निरन्तर व्यवस्थापन गर्नु हाम्रो लागि चुनौतीपूर्ण विषय बनेको छ ।
नेपाल रेडक्रस सोसाइटी धनुषाबाट महोत्तरी, सर्लाही, सिन्धुली, सिरहा लगायतका जिल्लाहरुमा रहेको अस्पताल, स्वास्थ्य संस्था तथा नर्सिङ्ग होमहरुमा रगतको आपूर्ति हुँदै आएको छ भने त्यहाँबाट भारतको बिहारस्थित मधुबनी र सितामढीका अस्पतालहरुमा समेत रगतको आपूर्ति गरिन्छ ।
धनुषास्थित ब्लड बैंकमा अहिले सबै ब्लडग्रुप मिलाएर १४ पोका मात्र रगत मौज्दातमा रहेको रेडक्रस सोसाइटीका अध्यक्ष सिंहले बताए । लकडाउनका कारण रगतको अभाव भएपछि नियमित उपचार गराइरहेका जटिल प्रकृतिका बिरामीहरु बढि समस्यामा पर्ने भएको छ ।
यो विषयमा आफ्नो प्रतिक्रिया दिनुहोस् !