जलेश्वर, चैत २८ गते । विश्वभरि फैलिएको कोरोना भाइरसको महामारी रोकथाम तथा नियन्त्रणका लागि प्रदेश २ महोत्तरी जिल्लाका मटिहानी नगरपालिका सक्रियताका साथ पुर्वतयारीमा जुटेका छन ।
मटिहानी नगरपालिकामा हाल १५ बेड सहितको सुविधा सम्पन्न एक क्वारेन्टाईन निर्माणका साथै नगरपालिकाका सबै वडामा साबून, मास्क वितरण र लामखुट्टै औषधि छिर्काउ काम तिव्र रुपमा अघि बढाएको छ ।
गत साता नै नगरपालिकाको वडा नम्बर ७ स्थित नेपाल संस्कृत विश्वविद्यालय याज्ञवलक्य लक्ष्मी नारायण विद्यापीठमा निर्माण गरिएको सो क्वारेन्टाईन चिकित्स र स्वास्थ्यकर्मीका साथै सहयोगका लागि स्वयंसेवक खटाइएको छ । कोरोनाको शंकास्पद बिरामी बोक्न एम्बुलेन्सको व्यवस्था समेत रहेको मेयर हरिप्रसाद मण्डलले जानकारी दिए ।
सो क्वारेन्टाईनमा नगरपालिकाबाटै चिकित्सक र स्वास्थ्यकर्मीको सुरक्षाको लागि पिपिई र चेकजाँचका लागि थर्मल गन लगायत औषधिको समेत समुचित व्यवस्था रहेको उनले जनाए । हालसम्म सो क्वारेन्टाईन शंकास्पद बिरामी भर्ना भएको छैन ।
हुनत छिमेकी राष्ट्र भारत सहित विभिन्न देशबाट आएका व्यक्तिहरुको घर दैलोमै पुगी पालिकाबाट खटाइएका स्वास्थ्यकर्मी र स्वयंसेवक सहितको टोलीले थर्मल गनले ज्वरो चेकजाँच सहित उनको स्वास्थ्य अवस्था बारे दैनिक रुपमा जानकारी लिइरहेको मेयर मण्डलले बताए । पालिकामा रहेका ४ वटै स्वास्थ्य चौकीमा कोरोना शंकास्पद बिरामी र त्यस्ता लक्षण देखिएका व्यक्तिको उपचार दैनिक रुपमा भइरहेको छ ।
कोरोना भाइरस रोकथाम एवं नियन्त्रणका लागि जारी लकडाउनले गर्दा मार्कामा परेका दलित, गरीब, असहाय र दैनिक ज्यालादारीमा काम गर्ने मजदूरको खाद्यान्न राहत पनि प्रदेश सरकारले उपलब्ध गराएको रकमबाट एक÷दुई दिनभित्रै गरिने मेयर मण्डलले जानकारी दिएका छन ।
उनले भने सर्वदलीय बैठकबाट नगरपालिकाबाट नभई वडाहरुबाटै खाद्यान्न राहत वितरण गर्ने निर्णय अनुरुप सबै वडालाई करीब डेढलाख रुपैयाको दरले रकम दिइएको छ लगत संकलनको काम सम्पन्न भए लगतै खाद्यान्न वितरण हुनेछ ।
नगरपालिकाले कोरोना भाइरसको महामारीबाट बच्न विभिन्न आमजनताको सचेतना र सर्तकताका लागि विभिन्न जनचेतनामूलक सन्देश पर्चा पम्पलेट र माइकिंग मार्फत प्रसारण गराउंदै आएको छ ।
यो विषयमा आफ्नो प्रतिक्रिया दिनुहोस् !