जनकपुरधाम, चैत २८ गते । कोरोना भाइरसको महामारी रोकथामका लागि जारी लकडाउनमा मार्कामा परेका नागरिकका लागि खाद्यान्न वितरणमा जनकपुरधामका वडाध्यक्षहरु सक्रिय भएको छ ।
लकडाउन जारी भएको १८ औं दिनसम्म जनकपुरधाम उपमहानगरपालिकाले गरीब, दलित, असहाय र दैनिक ज्यालादारीमा काम गर्ने मजदूरलाई राहत उपलब्ध गराउन नसकेपछि वडा नम्बर एकका अध्यक्षले आफ्नो पहलमा त्यस्ता पिडीतहरुलाई खाना वितरणको शिविर चलाएको छ ।
जनकपुरधाम उपमहानगरपालिकाले लकडाउनका कारण खाना खान नपाउने परिवारका लागि कुनै राहत व्यवस्था गर्न नसकेपछि कोही भोकै नबसुन उद्देश्यले आफ्नै पहलमा गत एक हप्तादेखि गरीबहरुका लागि खाना शिविर संचालन गराईएको वडाध्यक्ष शत्रुध्न साहले बताए ।
सो शिविरबाट दैनिक एक हजारको हाराहारीमा सो वडा सहित जनकपुरधामका विभिन्न वडाका गरीब, दलित र दैनिक ज्यालादारी काम गर्ने मजदूरहरुले बिहान र बेलुका गरी दुई छाकको खाना पाउने गरेको छ । शुरुमा वडाध्यक्ष साहले आफ्नै लगानीमा शिविर संचालन गरेका थिए । पछि विभिन्न दाताहरुले दैनिक रुपमा रुपैया र खाद्यान्न सामाग्री दिएर सहयोग गर्दै आएका छन ।
उपमहानगरपालिकामा प्रदेश सरकारले २० लाख र विपद व्यवस्थापन समितिमा ८० लाख रुपैया रहेपनि हालसम्म खाद्यान्न राहतका पटक पटक ताकेता गर्दा हालसम्म कुनै पहल वा समन्वय हुन नसकेको दुखेसो उनले सुनाए ।
सो शिविरबाट नियमित रुपमा खाना पाइरहेकोमा स्थानीय गरीब परिवार निकै खुशी छन । उनीहरुले भोकमरीको बेलामा यस्तो सहयोग गर्नु भनेको ठूलै धर्मको काम रहेको बताए ।
खाना शिविर संचालन निकै व्यवस्थित र लकडाउनको मापदण्ड अनुसार नै भइरहेको देखिएको छ । खाना त्यहाँ नखुवाई व्यक्तिहरुले आ आफ्नो घरबाट बर्तन लिएर आउंछन र परिवार संख्याको हिसाबले भात, दाल र तरकारी लगायतका खाना लिएर जाने गर्छन । प्रत्येक व्यक्तिलाई एक मीटरको दूरी कायम गरी लाईनको लगाई खाना वितरण गरिदै आएको छ ।
शुक्रवार सो शिविरको सहायक प्रमुख जिल्ला अधिकारी शरतकुमार पोखरेल, नेपाल रेडक्रस सोसाइटी धनुषाका अध्यक्ष नरेश सिंह, चिकित्सक र सुरक्षाकर्मीका प्रतिनिधिहरुले मापदण्ड अनुसार स्वच्छ खाना वितरण भइरहेको छ छैन बारे निरिक्षण समेत गरेका छन ।
शुक्रवार खाना शिविरका आयोजक जनकपुरधाम स्थित सीताराम गौशाला रहेको थियो भने हालसम्म जनकपुर मोटरसाइकल विक्री एशोसिएसन, स्वराज शो रुम, मारवाडी सेवा समिति, संजय गाडिया, कृष्णचन्द्र साह, रामजानकी सःमिल, जानकी मोटर, रंजन प्रधान, प्रमोद अग्रवाल, नटराज ज्वेलर्स, गोरख यादव र श्यामकुमार मिश्र लगायतका व्यक्तिहरुले आर्थिक सहयोग गरेका छन ।
यो विषयमा आफ्नो प्रतिक्रिया दिनुहोस् !