वीरगञ्ज, चैत २७ गते । सीमावर्ती रक्सौल स्थित क्वारेन्टाईनमा रहेका नेपाली सँग भेटेर आएको कारण संघीय सांसद प्रदीप यादवलाई गृह मन्त्रालयले क्वारेन्टाइनमा राख्न निर्देशन दिएको छ ।
बिहीबार जिल्ला प्रशासन कार्यालय पर्सालाई गृह मन्त्रालयले सांसद यादवलाई क्वारेन्टाइनमा राख्न निर्देशन दिएको छ । समाजवादी पार्टी नेपालका नेता समेत रहेका सांसद यादव सहित उनीसँगै क्वारेन्टाईनमा गएका अन्य चार व्यक्तिलाई पनि क्वारेन्टाईन राख्न गृहमन्त्रालयले भनेको छ ।
क्वारेन्टाइनमा बसेका व्यक्तिलाई अनधिकृत रुपमा भेटेर फर्किएपछि कानुनले तोकेबमोजिम क्वारेन्टाइनमा राख्ने व्यवस्था गर्न जिल्ला प्रशासन कार्यालय पर्सालाई निर्देशन दिइएको गृह मन्त्रालयका सहप्रवक्ता उमाकान्त अधिकारीले जानकारी दिएका छन ।
उनका अनुसार ‘क्वारेन्टाइनमा बसेका व्यक्तिलाई भेट्न पाइँदैन । जारी निर्देशिका र नीतिविपरीत सांसद यादवले क्वारेन्टाइनमा बसेका मानिसलाई अनाधिकृत रुपमा भेटियो, नियमतः क्वारेन्टाईनमा रहेका व्यक्तिसँग सम्पर्क गर्नेलाई पनि क्वरोन्टाइनमा राख्नुपर्छ ।
यसैबीच पर्साका प्रमुख जिल्ला अधिकारी विष्णुकुमार कार्कीले सांसद यादव सहित उनी सँगै गएका चारैजना व्यक्तिलाई क्वारेन्टाईनमा राखिएको छ । हाल उनीहरु आफ्नो निगरानीमा रहेका र १४ दिनसम्म बाहिर निस्कन नपाउने बताएका छन ।
दुवै देशमा लकडाउन जारी रहेको अवस्थामा सीमापारी गएर कोरोना शंकास्पद व्यक्तिलाई भेटेर आएकोले उनलाई क्वारेन्टाईनमा राख्नुपर्ने मांग चर्को रुपमा उठिरहेको थियो । पुर्व संविधान सभा सदस्य विचरी यादव लगायतका नेताहरुले कोरोना शंकास्पद व्यक्तिसँग भेटेर आएको भनी क्वारेन्टाईनमा राख्नुपर्ने मांग गर्दै आएको थियो ।
सीमापारी क्वारेन्टाईनमा रहेका नेपालीहरुलाई मास्क, सेनिटाईजर चिउरा र भुजिया लगायतका खाद्यय सामाग्री वितरण गर्न विश्व स्वास्थ्य संगठनको मापदण्ड अनुसार त्यहाँ भेटेर आएको सांसद यादवले पनि स्वीकारेका छन ।
यो विषयमा आफ्नो प्रतिक्रिया दिनुहोस् !