जनकपुरधाम, विश्वभरि महामारीको रुप लिएको कोरोना भाइरस (कोभिड १९) को उच्च जोखिममा रहेका प्रदेश २ मा संक्रमितको उपचारका लागि आइसोलेशनको व्यवस्था रहेको प्रदेश सरकारको कुरा हावादारी गफ मात्र रहेको देखिएको छ ।
प्रदेश २ सरकार र स्वास्थ्य निर्देशनालयले विरगंजस्थित नेशनल मेडिकल कलेजमा ५०, जनकपुरधामको रमदैया स्थित जानकी मेडिकल कलेजमा ६० र त्यसको सिटी होस्पीटलमा २०, राजविराजमा १० र प्रादेशिक अस्पतालमा ५ गरी कुल १ सय ८५ वटा वार्डको आइसोलेशन व्यवस्था गरिएको दाबी गर्दै आएको छ ।
तर शंकास्पद वा संक्रमित पुग्दा यहाँ कोरोना भाइरस संक्रमितको उपचार नभइरहेको भनी अस्पतालले फर्काउने गरेको पाइएको छ । करिब एक साता अघि दुबईबाट फर्केका सिरहाको औरही गाउँपालिकाका ४० वर्षीय एक व्यक्तिलाई कोरोना संक्रमणको आशंकामा उपचार गराउन रमदैया स्थित जानकी मेडिकल शिक्षण अस्पताल ल्याइयो ।
त्यहाँ पुग्दा ती बिरामीलाई अस्पतालले उपचारको व्यवस्था नरहेको भन्दै त्यहाँको प्रशासनले एम्बुलेन्सबाट चेकजाँच त के ओर्लिन पनि दिइएन । केहीबेर पछि उनलाई अस्पताल प्रशासनले प्रादेशिक अस्पताल जनकपुर पठाए । त्यहाँपनि कोरोना भाइरस संक्रमणको आशंका रहेको सुन्ने बितिकै चिकित्सकले एम्बुलेन्सबाट ओर्लिन दिएनन् ।
अस्पतालको इमरेजन्सी वार्डका इन्चार्ज रामगोपाल साहले यहाँ कोरोना उपचारको लागि औषधि उपचार र उपकरणसहितको व्यवस्था नभएकाले काठमाडौंस्थित टेकु अस्पताल रेफर गरेको बताए ।
त्यस्तै बुधबार साँझ कोरोनाको संक्रमित भन्दै एम्बुलेन्समा राखेर अर्का एक बिरामीलाई जनकपुरको ब्रहम्पुरी स्थित जानकी मेडिकल शिक्षण अस्पतालको सीटी हस्पिटल आएको थियो ।
सिकिस्त रहेका ती बिरामीलाई प्रदेश सरकारले कोरोना संक्रमित बिरामीको उपचार गर्छ भनी ल्याइएको थियो । कोेरोना संक्रमित भनिएका ती बिरामीलाई काठमाडौंबाट ल्याइएको एम्बुलेन्स चालकले जनाएको हस्पिटलका इमरजेन्सी कक्षका एक चिकित्सकले बताए । तर त्यहाँपनि उनको उपचार नभएपछि कहाँ गयो अतोपतो छैन ।
प्रदेश सरकारले सिटी हस्पिटलमा कोरोना संक्रमितलाई उपचार गर्न आइसोलेशन वार्ड व्यवस्थापन गरेको भनेर भ्रम मात्र रहेको माथिल्लो कुराले प्रष्ट हुन्छ ।
प्रदेश स्वास्थ्य निर्देशनालयका बरिष्ठ अधिकृत विजय झाले कोरोना संक्रमित तथा शंकास्पद बिरामीलाई सिटी हस्पिटलमा २० बेडको आइसोलेशन वार्ड तयार गरिएको र उपचारको लगि व्यवस्थापन पनि त्यहि गर्ने प्रदेश सरकारले निर्णय गरिसकेको दावी गरे ।
तर एम्बुलेन्सबाट बिरामीलाई न त जानकी मेडिकल शिक्षण अस्पताल रमदैयामा भर्ना लिइएको छ नत त्यसको शाखा हस्पिटलको रुपमा रहेको जनकपुर स्थित सिटी हस्पिटलमा । त्यहाँ कोरोनाको आशंकामा आएका बिरामीलाई एम्बुलेन्सबाट ओर्लनसमेत नदिइएको पीडितहरुको गुनासो छ ।
प्रादेशिक अस्पताल जनकपुरमा पनि कोरोनाको शंकास्पद बिरामीलाई राख्ने र उपचारको कुनै व्यवस्थापन नभएको अस्पताल प्रमुख डा. नागेन्द्र यादवको भनाई छ ।
उनले भने यहाँ पाँचवटा आइसोलेशन वार्डको व्यवस्था गरिएको छ । कोरोना संक्रमित तथा शंकास्पद बिरामीलाई उपचार गर्न सरकारले पाँचवटा पीपीई ड्रेस र दुईवटा थर्मल गन उपलब्ध गराएको छ तर ती केही शंकास्पद बिरामी आएपछि चेकजाँच र उपचारको क्रममा पाँचवटै पीपीई प्रयोग भइसकेकोले उपचार कसरी गर्ने ।
कोरोना संक्रमणको शंकास्पद बिरामीको कुनै तथ्यांक प्रदेश स्वास्थ्य निर्देशनालय र प्रदेश सरकारसंग छैन । आएका शंकास्पद बिरामीलाई उचित ठाउँमा व्यवस्थापन गरेर उपचार गर्नु अथवा कुनै ठाउँमा पठाउँदा तिनीहरुको कुनै सम्पर्क र जानकरी राखिएको देखिदैन ।
झाका अनुसार वीरगञ्जस्थित नेशनल मेडिकल कलेजमा ५० बेडको, नारायणी उपक्षेत्रीय अस्पताल र सप्तरी सदरमुकाम राजविराजस्थित गजेन्द्रनारायण सिंह सगरमाथा अञ्चल अस्पतालमा १० बेडको आइसोलेसन तयार रहेको छ ।
सप्तरीको रायपुरस्थित यूनिक अस्पतालमा १० बेडको, सिराहाको लहानस्थित सप्तऋषि अस्पतालमा ५ बेडको आइसोलेसन तयार भएको छ । बारा अस्पतालमा पनि १५ बेडको आइसोलेसन बेड तयार भएको झाको भनाई छ ।
यो विषयमा आफ्नो प्रतिक्रिया दिनुहोस् !