जनकपुरधाम, कोरोना भाइरस (कोभिड १९) को रोकथाम र सर्तकताका लागि लकडाउनको क्रममा मार्कामा परेका गरीब असहाय र दैनिक ज्यालादारी कामदारका लागि छिट्टै नै राहत उपलब्ध गराउने प्रदेश २ आन्तरिक मामिला तथा कानून मन्त्री ज्ञानेन्द्र यादवले बताएका छन ।
बुधवार लोकपुकार सँग कुरा गर्दै सरकारका प्रवक्ता समेत रहेका मन्त्री यादवले भने लोकडाउन गर्नु हाम्रो रहर होइन बाध्यतात्मक परिस्थिति हो र यसले गर्दा दैनिक ज्यालादारी गर्ने र गरीब असहायलाई मार्का परेको छ त्यस्ता घरपरिवारका व्यक्तिको लागि सरकारले छिट्टै नै खाद्यान्न सहितका राहत प्याकेज घोषणा गर्नेछ ।
उनले भने चाँडै बस्ने मन्त्रिपरिषदको बैठकमा यस सम्बन्धमा कुराकानी हुनेछ र राहत प्याकेज सहित महत्वपूर्ण निर्णयहरु लिइने छ । मार्कामा परेकाहरुलाई स्थानीय तह मार्फत तथ्यांक संकलन गरी स्थानीय प्रहरी वा सम्बन्धित पालिकामार्फत घरमै खाद्यान्न सामाग्री पुरयाइने प्रदेश सरकारको योजना रहेको छ ।
साथै उनले प्रदेश २ खुल्ला सीमानाका र वैदेशिक कामदारहरुको क्षेत्र रहेको कारण उच्च जोखिम रहेको दृष्टिगत गर्दै सरकारले प्रदेशका ७ ठाउँमा क्वारेन्टाईन र नेशनल मेडिकल कलेज तथा जानकी मेडिकल कलेजको सिटी अस्पतालमा सुविधायुक्त आइसोलेशन वार्डको व्यवस्था गरिएको जानकारी दिए ।
मन्त्री यादवले लकडाउन अवस्थामा सरकारले खाद्यान्न सामाग्री, एलपी ग्यास र औषधि पसल खोल्न निर्देशन जार गरेपनि प्रदेश भित्र कोरोनाको त्रासले व्यवसायीहरुले पसल बन्द गरेको कारण कृतिम आभाव श्रृजना गर्ने व्यवसायीलाई कडा भन्दा कडा कारवाही गरिने बताए ।
प्रदेश २ मा राजधानी जनकपुरधाम सहित प्रदेशका जिल्लाहरुमा लकडाउन प्रभावकारी देखिएको छ । बजार पुरै बन्द छ भने आम नागरिक आ आफ्नो स्वास्थ्यको ख्याल गर्दै घरबाट हिजोदेखि निस्केको छैन । केही व्यक्ति निस्केको देखिएपछि तिनीहरुलाई नियन्त्रणमा लिने गरेको छ ।
यो विषयमा आफ्नो प्रतिक्रिया दिनुहोस् !