जनकपुरधाम, प्रदेश २ को नामाकरणका लागि नेपाल कम्युनिष्ट पार्टीले प्रस्ताव गरेको जानकी प्रदेश अस्वीकृत भएको छ ।
निर्वाचन प्रक्रिया अनुसार प्रतिपक्षी दल नेकपाले प्रस्ताव गरेको जानकी प्रदेशबाट मतदान शुरु गरिएको हो । १ सय ७ मत रहेकोमा जानकी प्रदेशमा मात्र ३७ मत खसेको छ । नाम सदरका लागि दुई तिहाई अर्थात ७२ मत चाहिन्छ ।
दलहरुले प्रस्ताव गरेको विभिन्न नाममा क्रमबद्ध रुपमा मतदान हुनेछ । नामाकरणका लागि प्रतिपक्षी नेकपाले जानकी, कांग्रेसले मिथिला भोजपुरा, सत्तापक्ष तथा कांग्रेसका असन्तुष्टहरु सांसदहरुले मध्य मधेश र सत्तारुढ समाजवादी तथा राजपाले संयुक्त रुपमा मधेश प्रदेश प्रस्ताव गरिएको नाममा मतदान जारी रहेको छ ।
प्रदेशको नामाकरण र स्थायी राजधानीका लागि मंगलवार दिउंसोदेखि मतदान शुरु भएको हो । प्रदेश सभाका सभामुख सरोजकुमार यादवको मतदानबाट मतदान कार्य करीब अढाई बजेदेखि शुरु भएको हो । सभामुखपछि उपसभामुख उपमादेव, मुख्यमन्त्री लालबाबु राउत, भौतिक पुर्वाधार मन्त्री जितेन्द्र सोनलपछि क्रमशः मन्त्री र सांसदहरुले मतदान गरेका छन ।
नामका लागि ४ र राजधानीका ३ गरी विभिन्न सात चरणमा निर्वाचन हुने सभामुख सरोजकुमार यादवले जानकारी दिनु भयो । पहिलो चरणमा नामका लागि जानकी प्रदेशमा मतदान शुरु भएको हो । निर्वाचन प्रक्रिया अनुसार दुई तिहाई अर्थात ७२ मत जुन प्रस्तावमा पुग्नेछ त्यही सदर हुनेछ ।
उहाँले भन्नु भयो ‘जानकी प्रदेश’ नाममा दुई तिहाई अर्थात ७२ मत खसेमा त्यही नाम सदर हुनेछ, यदि त्यस्तो भएन पुनः हाउस बस्ने र अर्को मिथिला भोजपुरा हुँदै मधेश प्रदेशसम्म विभिन्न चरणमा मतदान हुन्छ । प्रदेशको नाममा टुंगो लागेपछि राजधानीको मतदान हुनेछ र राजधानीको हकमा पनि त्यही नियम लागू हुनेछ ।
राजधानीका लागि जनकपुरधाम, विरगंज महानगरपालिका र विरगंज महानगरपालिका सहित पोखरिया, सिम्रौनगढ, निजगढ समेटिएका क्षेत्र सहित तीन प्रस्ताव गरिएको हो । सत्तारुढ र प्रतिपक्षी दलहरुले संयक्त रुपमा जनकपुरधाम प्रस्ताव दर्ता गराएको छ भने सत्तारुढ समाजवादी र राजपा सहित कांग्रेसका असन्तुष्ट सांसद हरुले विरगंज र विरगज सहितका क्षेत्र दर्ता गराएको थियो ।
प्रदेशको नाम टुँगो लागेपछि राजधानीबारे चुनाव हुनेछ । आज रातिसम्ममा प्रदेश २ ले नाम र राजधानी पाउने प्रदेश २ को प्रदेश सभाले जनाएको छ । प्रदेश २ को राजधानी जनकपुरधाम, विरगन्ज वा विरगन्ज लगायत आसपासका क्षेत्रलाई समेटेर तोक्ने प्रस्ताव भएको छ ।
यसअघि नेपाल कम्युनिष्ट पार्टी नेकपाले जानकी प्रदेशकै पक्षमा र कांग्रेसले मिथिला भोजपुरा प्रदेशको नाममा मतदान गर्न आ आफ्ना सांसदहरुलाई व्हिप नै जारी गरेको थियो । कांग्रेस तथा नेकपाका केही सांसद मधेश प्रदेशको पक्षमा देखिएकाले क्रस भोटिङ्ग हुन सक्ने सम्भावना देखिएपछि ह्विप जारी गरिएको नेताहरुले बताएका छन् ।
प्रदेश २ मा १ सय ७ सांसद रहेकोमा संघीय समाजवादी पार्टीका ३१, राजपा नेपालका २५, नेकपाका ३२, कांग्रेसका १९ सांसद रहेका छन् ।
सभामुख यादवको संयोजकत्वमा गठित ९ सदस्य विशेष अध्ययन समितिले राजधानीमा सहमति जुटाएपनि नाममा सहमति जुटाउन नसकेपछि नाम र राजधानी दुवैका लागि मतदान हुन लागेको हो ।
यो विषयमा आफ्नो प्रतिक्रिया दिनुहोस् !