जनकपुरधाम, जनकपुरधाम उपमहानगरपालिकामा पत्रकार कुटपिट घटनामा होटल व्यवसायी धर्मेन्द्र साहलाई निर्दोष भन्दै जनकपुर उद्योग वाणिज्य संघले रिहा गराएको थियो ।
घटनाको दुई महिनापछि पुनः जनकपुर टेलिभिजनका संचालक संचार उद्यमी एवं औषधी व्यवसायी प्रमोद अग्रवाललाई जउवा संघ पदाधिकारीकै उपस्थितिमा साहले कुटपिट गरेका थिए । घटनाको एक सातासम्म पनि चुप्पी साधेर बसेका जउवा संघले आइतवार दबावपछि साहको गल्ती स्वीकार गरेको छ ।
त्यति मात्र होइन जनकपुरस्थित रुफटप रेस्टुरेन्टका सञ्चालक रहेका साहलाई कारवाही गर्न मांग समेत सम्बन्धित निकायसँग गरेको छ । आइतवार एक प्रेस विज्ञप्ति जारी घटना दुखद रहेको भन्दै दोषी साहलाई कारवाही गर्न मांग गरेको हो ।
‘जग्गा जमिन सम्बन्धमा छलफल चलिरहँदा निज धर्मेन्द्र साहले प्रमोदकुमार अग्रवाल (पप्पु) माथि आक्रमण गरेको घटनासम्बन्धमा यस संघको गम्भीर ध्यानाकर्षण भएको छ,’ वाणिज्य संघले आइतबार जारी गरेको विज्ञप्तिमा भनिएको छ,‘शान्तिपूर्वक छलफल गरी समाधानको प्रयास गर्नुपर्नेमा कसैको शरीरमा हात हाल्ने कार्यलाई कदापि उचित ठहराउन सकिँदैन विज्ञप्तिमा भनिएको छ ।
न्यायिक मार्ग अवलम्बन गरी दोषीलाई न्यायिक प्रक्रियामा ल्याउन अध्यक्ष ललितकुमार साह र महासचिव जितेन्द्र महासेठले संयुक्त रुपमा जारी गरेको विज्ञप्तिमा मांग गरिएको छ ।
जग्गासम्बन्धी छलफलको क्रममा राजपाका कार्यकर्तासमेत रहेका साहले औषधि व्यवसायी प्रमोदकुमार अग्रवाल (पप्पु) माथि गत २६ गते हातपात गरेका थिए । राम युवा कमिटीको कार्यालय भएको छलफलमा वाणिज्य संघका पदाधिकारीहरु समेत उपस्थित रहेका बेला साहले व्यवसायी अग्रवालमाथि हातपात गरेका थिए ।
व्यवसायीमाथि हातपात हुँदा समेत वाणिज्य संघ मौन बसेको भनी चर्को आलोचना र दबाव पर्न थालेपछि जउवा संघले यस्तो कदम उठाएको हो ।
यसअघि सञ्चार उद्यमीसमेत रहेका अग्रवालमाथि भएको हातपातको नेपाल पत्रकार महासंघ, मधेशी पत्रकार समाज, औषधि व्यवसायी संघ, निजी शैक्षिक संघ संगठन लगायतका पेशागत संघसंस्थाहरुले घटनाको विरोध गर्दै दोषीउपर कारबाहीको माग गरिसकेका छन ।
यो विषयमा आफ्नो प्रतिक्रिया दिनुहोस् !