जनकपुरधाम, वर्षौदेखि जनकपुरधाम उपमहागरपालिका ४ विश्वकर्मा चौक नजिक गुठीको मोहियानी जग्गामा बसोबास गर्दै आएकाहरुको घर तोडने क्रम शुरु गरिएको छ ।
शनिवारदेखि उच्च अदालतको आदेशानुसार कि.नं. १२८ को ८ कट्ठा ३ धुर जग्गामा करीब २० वर्षदेखि बसोबास गर्दै आएकाहरुको घर प्रहरीको सहयोगमा डोजर लगाई तोडने कार्य शुरु गरिएको हो । सो जग्गामा दर्जनौ घर रहेपनि चन्द्रा देवी भन्ने व्यक्तिको घर मात्र तोडिएको हो ।
घण्टौ विवादपछि घर तोडने कार्य शुरु गर्नै लाग्दा वडा नम्बर ७ मुसहरी वस्तीमा अवैध मदिरा सेवनले केही व्यक्तिको मृत्यु भएको घटना घटेपछि प्रहरी त्यहाँ गइसकेपछि अन्य घर पछि तोडने गरी हाललाई स्थगित गरिएको मुजेलिया प्रहरी चौकीले जनाएको छ ।
प्राप्त जानकारी अनुसार अदालतका कर्मचारी प्रेम दाहालका छोरा धिरेन्द्र बहादुर दाहालको नाममा मोहि रहेको सो गुठीको सफारिस अनुसार खरीद गरेका व्यक्तिहरुले सो घर भत्काई सो जग्गा खाली गराइएको हो । प्रेम दाहालको नाममा मोही रहेको सो जग्गा रजिन्द्र ठाकुरले जोतकोर गर्दै आएको अवस्थामा दाहालले छोरा धिरेन्द्रको नाममा वारेस कायम गरी २०४४ सालमा मोही कायम गरेका थिए ।
पछि सो जग्गामा जनकपुर ११ का आनन्द सहनीले दाबी गर्दा २०६५ सालमा गुठीले मोही कुतवाली बुझाइसकेको भनी मोही हक हुनेगरी जग्गा विक्रीका लागि मालपोत कार्यालय सिफारिस गरेको थियो । पछि सोही आधारमा विरेन्द्र साह र रामदुलार साहको नाममा मोही हक कायम गरयो ।
जग्गा खरीद गरेपनि घर खाली गराउन सकेपनि कानूनी उपचारका लागि तात्कालिन पुनरावेदन अदालतमा मुदा समेत दायर गरियो । अदालतबाट जग्गा खाली गराउने आदेशपछि जग्गा खाली गर्न आग्रह गर्दा पनि अन्त्यमा शनिवार प्रहरी सहयोगमा सो जग्गा खाली गराउन लागिएको थियो ।
यता पिडीत व्यक्तिहरुले आफूहरु गुठी संस्थानलाई ठाकुर भन्ने कर्मचारीलाई रकम बुझाएर करीब २० वर्षदेखि बसोबास गर्दै आएका थिए, कसैले रोकटोक गरेन तर यसैबीचमा रामदुलार साह भन्ने व्यक्तिले यो जग्गा आफ्नो हो दाबी गर्दै थप रकम मांग गर्दा नदिएपछि खाली गराएको आरोप लगाएका छन ।
घटना बारे रामदुलारले भने यो जग्गा धिरेन्द्र दाहालको मोही हुँदै गुठीको सिफारिस अनुसार आफ्नो र विरेन्द्र साहको नाममा मोही हक कायम भएको हो । पटक पटक खाली गर्न भनेपनि नमानेपछि कानूनी प्रक्रियाबाट उच्च अदालतले गरेको आदेशको पालना प्रहरी लगायतका कानूनी निकायले गरेको हो ।
श्रोतका अनुसार माओवादी जनयुद्धकालमा प्रचण्डले एकल र भूमिहीनलाई बसोबास गराउने उद्घोष अनुसार केहीलाई त्यही समयमा बसोबास गराइयो पछि गुठीका केही कर्मचारीले रकम लिई जग्गामा बसाएका थिए ।
यसैबीच घटनास्थलमा पुगेका अदालतका कर्मचारीसँग घटनाको वास्ताविकता जिज्ञासा राख्दा अधिकारिक जानकारी दिन मानेन । उनले भने अदालतको आदेश हामी कार्यान्वयन गराउन हामी पुगेका हौं अरु मलाई केही थाहा छैन ।
यो विषयमा आफ्नो प्रतिक्रिया दिनुहोस् !