जनकपुरधाम, जनकपुरधाम स्थित जानकी ईग्लिस बोर्डिंग स्कूलका संस्थापक एवं संचार उद्यमी प्रमोद अग्रवालमाथि आक्रमण गर्नेलाई कारवाहीको मांग गर्दै निजी विद्यालयसँग आबद्ध शैक्षिक संगठनको एकीकृत संघर्ष समितिले विरोध प्रदर्शन गर्ने भएको छ ।
समितिद्वारा जारी प्रेस विज्ञप्तिमा घटनाको भत्र्सना गर्दै दोषीमाथि अविलम्ब कारवाही नगरिए चरणबद्ध आन्दोलन गर्ने चेतावनी दिएका छन । सोही क्रममा चैत ३ गते सोमवारका दिन विरोध प्रदर्शन गर्ने निर्णय गरेको छ ।
अग्रवाल कुटपिट घटनाको आन्दोलनका लागि नगरका एनप्याबसन, प्याबसन, मधेश प्याबसन, नेपाल प्याबसन र पीटीए धनुषा सम्मिलित एकीकृत संघर्ष समिति गठन गरिएको हो ।
गत फागुन २६ गतेका दिन अग्रवाललाई जनकपुरधाम उपमहानगरपालिका वडा नं. २ निवासी रुफटप होटलका संचालक धर्मेन्द्र साहले उनको जग्गा बलजफ्ती कब्जा गर्ने नियतमा कुटपिट गरेका थिए ।
स्थानीय जनकपुर टेलिभिजनका संचालक एवं जनकपुर अंचल औषधी व्यवसायी संघका महासचिव समेत रहेका अग्रवालले गुठी संस्थानसँग भाडामा जग्गा लिएर संचालन गर्दै आएको औषधी पसलको जग्गाबाट आफूलाई केही जग्गा दिन भन्दै कुटपिट गरेका थिए ।
साह विरुद्ध जिल्ला कार्यालय धनुषामा उजुरी समेत दर्ता गराइएको छ । उजुरी परेपनि प्रहरीले उनलाई पक्राउ गर्न सकेको छैन । साहलाई कानूनी कारवाही नगरिएको कारण शैक्षिक संस्था, संचार क्षेत्र र औषधी व्यवसायी आन्दोलित भएका छन ।
पछिल्लो पटक समाचार संकलनको क्रममा जनकपुरधाम उपमहानरपालिकाका पत्रकारहरुलाई कुटपिट घटनामा संलग्न रहेको आरोपमा २ दिन थुनामा राखि प्रजिअले जनकपुर उद्योग वाणिज्य संघको दबावमा धरौटीमा रिहा गरेको थियो ।
साहको यो कुनै नौलो घटना होइन यसअघि पनि जनकपुरधाम स्थित अक्षर विद्या मन्दिरका संचालक पंकज जालानलाई समेत कुटपिट गरेका थिए । सो घटनामा पनि जनकपुर उद्योग वाणिज्य संघ र जनकपुरधामका मेयर लालकिशोर साहले हस्तक्षेप गर्दै सामसुम पारेका थिए ।
यो विषयमा आफ्नो प्रतिक्रिया दिनुहोस् !