लोक समाचारदाता
जनकपुरधाम, फागुन २४ गते ।
विश्वभर कोरोना भाइरसको प्रभाव बढदै गएपछि नेपालमा समेत सर्तकता अपनाउन थालिएको छ ।
नेपाल सरकारले कोरोनाको दृष्टिगत गर्दै सचेतना अपनाउन होली पर्व सहित विभिन्न सभा सम्मेलन, समारोह र सामूहिक कार्यक्रम नगर्न/गराउन दिएको निर्देशनको पालना जनकपुरधाम देखिएको छैन ।
दिनहुँ प्रदेश र स्थानीय सरकारकै उपस्थितिमा विभिन्न कार्यक्रमहरु आयोजना गरिदै आएको छ । यसैक्रममा कोरोना भाइरस बारे सचेतनाका लागि जनकपुरधाममा प्रत्येक वर्ष मिथिला नाट्यकला परिषदद्वारा मनाइने दुई दिने होली महोत्सव महामूर्ख सम्मेलनमा फरक ढंगबाट मनाइने भएको छ ।
कोरोना भाइरसको दृष्टिगत गर्दै मिनाप सहभागी कलाकार र उपस्थितिहरुलाई मास्क वितरण गर्दै कोरोनाबाट बच्ने उपाय सहितको प्रस्तुति गर्ने भएको छ । दुई दिने कार्यक्रम अन्तर्गत पहिलो दिन फागुन २५ गते होरी महोत्सव र २६ गते महामूर्ख सम्मेलन आयोजना गरिने मिनापले एक पत्रकार सम्मेलन आयोजना गरी जानकारी दिए ।
कार्यक्रम स्थलमा मास्क वितरण गर्नुका साथै रंग अबीरको सट्टा फुलको प्रयोग गर्ने छ र प्रत्येक वर्ष प्रस्तुत हुंदै आएको व्यगात्मक कविताको संगै यसवर्ष कोरोना भाइरस सचेतना समेटिएका कविताहरु वाचन गरिने मिनापका अध्यक्ष परमेश झाले जानकारी दिए ।
२५ गते आईतबार डम्फा वादनबाट उद्घाटन गरिने कार्यक्रममा होली माथि चर्चा परिचर्चा, निश्चित मापदण्ड अनुसार होरी गायन, उत्कृष्टाको चयन र पुरस्कार वित्तरण कार्यक्रम रहेको उहाँले जानकारी समेत दिए ।
कार्यक्रमको दोश्रो दिन विशिष्ट शैलीमा उदघाटन गरि होली गायन, मिनापको हास्य शैलीमा व्यङ्गपूर्ण नाट्क प्रस्तुती, हास्य कवि गोष्ठी, मूर्ख एवं महामूर्खको उपाधि वित्तरण, मूर्ख महामूर्खलाई सम्मान तथा प्रेमोपहार वित्तरणसँगै समापन गरिने भएको छ ।
मिनापका पूर्वअध्यक्ष सुनिम मल्लिककले यो पर्व एक प्रकारले महोत्सवको साथै परिक्रमाको परिपुरक रहेको बताए । होली पर्वको पौराणिक गाथाका विषयवस्तु, ख्यालठट्टा, प्रेमयुक्त र रस मिसिएका मैथिली भाषामा गाइने जोगिरा (फागु गीत) मिथिलाञ्चलमा लोप हुने अवस्थामा रहेको बेलामा त्यसको संरक्षण गर्न जनकपुरधामको मिथिला नाट्य कला परिषदले प्रत्येक वर्ष होली महोत्सव र महामुर्ख सम्मेलनको आयोजना गर्दै आएको छ ।
मिथिला नाट्यकला परिषद (मिनाप) ले २०६१ सालमा महामूर्खको उपाधि कवि नरेश ठाकुर, २०६२ मा एमाले नेता शीतल झा, २०६३ मा जनकपुर नगरपालिकाका तत्कालीन मेयर हरिबहादुर बिसी, २०६४ मा सदभावना नेता ओमकुमार झा, २०६५ मा वरिष्ठ साहित्यकार डा.राजेन्द्र विमल, २०६६ मा नेकपाका नेता रामचन्द्र झा,२०६७ मा राजनीतिक विश्लेषक सिके लाल, २०६८ मा साहित्यकार रामभरोष कापडि भ्रमर लगायतका पाइसकेका छन ।
त्यसैगरी २०६९ मा नेपाली कांग्रेसका नेता रामसरोज यादव, २०७० मा पूर्वसभासद डा।विजयकुमार सिंह,२०७१ मा नेकपाका नेता शत्रुधन महतो,२०७२ मा समाजसेवी पवन सिंघानिया,२०७३ मा मधेश आन्दोलनका कारण कार्यक्रम स्थगित गरिएको थियो भने २०७४ मा राजपा नेपालका उपाध्यक्ष वृषेशचन्द्र लाल र २०७५ सालमा जनकपुरधाम उपमहानगरपालिकाका मेयर लालकिशोर साहलाई महामूर्खको उपाधि प्रदान गरेको थियो ।
यो विषयमा आफ्नो प्रतिक्रिया दिनुहोस् !