लोक समाचारदाता
जनकपुरधाम,फागुन २३ गते ।
२०७८ मा हुने आगामी राष्ट्रिय जनगणना अन्तर्गत गरिने तथ्यांक संकलन कार्यलाई विश्वसनीय बनाउनुपर्नेमा वक्ताहरुले जोड दिएका छन ।
शुक्रवार जनकपुरधाममा तथ्यांक विभाग र जिल्ला कार्यालयको आयोजना तथा नेपाल पत्रकार महासंघको सहकार्यमा आयोजित अन्तरक्रिया कार्यक्रममा वक्ताहरुले पछिल्लो दिनको राष्ट्रिय जनगणनामा गणकहरुले घर र कार्यालय लगायतका ठाउँमा बसेर हचुवाको भरमा गरिएको हुनाले आगामी तथ्यांक संकलनमा त्यस्तो नहोस भन्ने सचेत समेत गराए ।
सूचना प्रचार प्रसारका लागि सञ्चारकर्मीसँग गरिएको अन्तरक्रिया कार्यक्रममा सहभागीहरुले सत्य तथ्य र सही तथ्यांकले देशको नीति तथा योजना निर्माण र कार्यान्वयनमा सहयोग पु¥याउने विश्वास व्यक्त गर्दै तथ्यांक संकलन कार्य घरसम्म पुगेर वास्तविक कुरा पहिचान गरी गर्न आग्रह गरे ।
केन्द्रिय तथ्यांक विभागले आगामी २०७८ सालको जेठ २५ गतेदेखि र असार ८ गतेसम्म १२ औं जनगणना गर्न लागेको हो । गणनामा ४३ हजार गणक र ९ हजार गणना सुपरिवेक्षक सहित ५२ हजार जनशक्ति परिचालन हुनेछ ।
अन्तरक्रियामा विभागका निर्देशक ढुण्डीराज लामिछानेले संघीय संरचनामा सामुदायिक प्रश्नावलीको प्रयोग गरी सम्पूर्ण घरधूरीहरुको प्रयोजनसहित गणना गर्न लागिएको जानकारी दिए । आगामी जनगणनालाई प्रविधिको प्रयोग गरेर स्थानीय तह अनुसारको नतिजा प्रकाशन गर्ने र तथ्यांक संकलनको विधि, प्रक्रिया र समावेशिताको विविध पक्षमा संचारकर्मीले निगरानी गर्नुपर्नेमा जोड दिए ।
अन्तरक्रियामा धनुषाका प्रमुख जिल्ला अधिकारी प्रदिपराज कणेलले विश्वसनीय तथ्यांक संकलनका लागि ६ महिना अगावै गणकहरुको पहिचान हुनुपर्ने र उनीहरुका लागि तालिमको व्यवस्थापन गर्नुपर्ने आवश्यकतामाथि जोड दिए ।
उनले भने, ‘प्रत्येक स्थानीय तहमा वडाअध्यक्ष र वडा सदस्यको रोहवरमा भाषाको सवालमा सहि तथ्यांक संकलन गर्नु आवश्यकता रहेको भन्दै झुठो विवरण लेख्ने र लेखाउनेहरुलाई कारवाहीका व्यवस्था गर्नुपर्ने विभाग सँग आग्रह गरे ।
कार्यक्रममा नेपाल पत्रकार महासंघ धनुषाका अध्यक्ष अनिल मिश्रले कुनै राजनीतिक दलको सिफारिसमा गणक नियुक्त नभई फेयर गणक हुनु पर्नेमा जोड दिदैं फेयर गणक भएको खण्डमा सही तथ्यांक आउने बताए ।
कार्यक्रममा तथ्यांक कार्यालय धनुषाका प्रमुख प्रविण चौधरी, नेपाल पत्रकार महासंघका पूर्व केन्द्रिय सदस्य अजय अनुरागी, नेपाल पत्रकार महासंघ प्रदेश २ का महासचिव किरण कर्ण, सल्लाहकार बिरेन्द्र रमण लगायतकाहरुको उपस्थिती रहेको थियो ।
यो विषयमा आफ्नो प्रतिक्रिया दिनुहोस् !