अजय अनुरागी
जनकपुरधाम, फागुन २३ गते ।
नेपाली राजनीतिमा परिवारवाद हावीको अर्को उदाहरण बनेका छन् राष्ट्रिय जनता पार्टी (राजपा) नेपाल अध्यक्ष मण्डलका सदस्य राजेन्द्र महतो ।
उनले पछिल्लो पटक पत्नी शैलदेवीलाई सभासद पछि ज्वाईं अनिलकुमार महासेठलाई प्रदेश २ का सभामुख सरोजकुमार यादवका राजनीतिक सल्लाहकार बनाएका छन ।
राजपा धनुषा अध्यक्ष मण्डलका सदस्य संजय सिंह प्रादेशिक अस्पताल जनकपुरको विकास समिति अध्यक्षमा मनोनित भएपछि गत ५ महिनादेखि सभामुख यादवको सल्लाहकार पद रिक्त रहेको थियो, सोही स्थानमा महतोले आफ्ना ज्वाईं महासेठलाई नियुक्त गरेका हुन ।
महासेठलाई सभामुख यादवको सल्लाहकारमा नियुक्त गरिएको कुराको पुष्टि प्रदेशसभा सचिवालयका सचिव रंजितकुमार यादवले गरेका छन । २०७६ माघ महिनादेखि नियुक्त गरिएको महासेठको मासिक ३० हजार ५ सय रुपैयाँ पारिश्रमिक रहेको यादवले जानकारी दिएका छन ।
यो पनि पढौं :
सिरहा जिल्ला निवासी महासेठ महतोका छोरीसँग विवाह गरेका हुन । छोरा राघवेन्द्र महतोलाई राजनीतिक चासो नभएपछि महतोले आफ्ना राजनीतिक उत्तराधिकारीका रुपमा स्थापित गर्न ज्वाईं महासेठलाई सल्लाहकार बनाएको भन्ने कुराको आंकलन राजपा भित्रै गर्न थालिएको छ ।
ज्वाइँ भएको कारण होइन कानून निर्माणमा योगदान गर्न सकौं भनेर पार्टीको निर्देशनानुसार आफूलाई सभामुखको सल्लाहकार बनाइएको महासेठले बताउँछन । उनले भने ‘पदकै लागि सल्लाहकार बनेको होइन,’ ‘पद नै चाहेको भए प्रदेश सरकारबाट मनोनयन हुने जुनसुकै राजनीतिक नियुक्ति लिइसकेको हुन्थें ।
राजपाका केन्द्रिय सदस्य रहेका महासेठले कानून बनिसकेपछि पनि संशोधन गर्न समस्या आउन सक्ने हुनाले निगरानी साथ प्रदेशको हितमा कानून निर्माण गर्ने उद्देश्यले सभामुखको सल्लाहकारमा नियुक्त भएका हौं भने ।
व्यवस्थापन विषयमा स्नातकोत्तर उत्तीर्ण गरेका महासेठ शुरूमा नेपाल बिद्यार्थी संघको राजनीति गर्दै आएको थिएँ, २०६३ सालको मधेश आन्दोलनपछि सद्भावना पार्टीमा आवद्ध भएर राजनीतिक कार्यकर्ताको रुपमा कार्य गर्दै आएको छु र सोही हैसियतमा आफू नियुक्त भएको भने ।
महतोले २०७० सालको दोस्रो संविधानसभा निर्वाचनमा आफ्ना पत्नी शैलदेवी महतोलाई तत्कालीन सद्भावना पार्टीको तर्फबाट समानुपातिक सभासद् बनाएका थिए । तीन दाजुभाइ रहेका महतोले जेठा दाजु महेन्द्र महतो सुडीलाई स्थानीय तहको निर्वाचनमा राजपाको तर्फबाट सर्लाहीको चन्द्रनगर गाउँपालिकामा अध्यक्षमा जिताए ।
पछिल्लो प्रतिनिधिसभा चुनावमा उनी आफैं धनुषा निर्वाचन क्षेत्र नम्बर ३ बाट उम्मेदवार बनेपछि आफ्ना क्षेत्र सर्लाहीको क्षेत्र नम्बर १(क) बाट प्रदेशसभाका लागि भातिज उपेन्द्र महतोलाई टिकट दिलाएर जिताए ।
त्यति मात्र होइन विगतमा उनी उद्योग, वाणिज्य तथा आपूर्ति मन्त्री भएको बेला महिलो दाजु जोगेन्द्र महतोलाई समेत मन्त्रालयमा राजनीतिक नियुक्ति गरेका थिए ।
यो विषयमा आफ्नो प्रतिक्रिया दिनुहोस् !