लोक समाचारदाता
जनकपुरधाम, फागुन २१ गते ।
कोरोना भाइरसको त्रास विश्वका विभिन्न देश सहित अब नेपालमा पनि व्याप्त भएको छ ।
नेपाल सरकारले कोरोना भाइरसको रोकथाम एवं सावधानीका लागि यसवर्ष होली नमनाउन र विवाह समारोहमा समेत पारिवारिक वाहेक अन्यमा सहभागी आग्रह गरेको छ ।
परराष्ट्रमन्त्री प्रदीपकुमार ज्ञवालीले यस वर्षको होली नमनाउन आग्रह गरेका छन् । परराष्ट्र मन्त्रालयमा आयोजित पत्रकार सम्मेलनमा उनले कोरोना भाइरसको रोकथामका लागि भरसक भीड हुने कार्यक्रम आयोजना नगर्न आग्रह गरेका हुन् ।
‘भीडभाड हुने गरी कुनै काम नगरौं । सकभर भीड हुने कामबाट बचौं । यसपटक होली नमनाऔं, ज्ञवालीले भने, ‘विवाहको विषयलाई पनि आफ्नो पारिवारिक विषय मात्रै बनाऔं । विवाह शादी समारोहमा पारिवारिक सदस्य बाहेक अन्यलाई सहभागी नगराऔं र नहोऔं ।
ज्ञवालीले अहिलेसम्म नेपाल कोरोना भाइरसबाट मुक्त रहेको भन्दै नेपाललाई संक्रमणबाट जोगाउनका लागि सरकारले विभिन्न कदम चालेको बताए । यस वर्षको होली फागुन २६ र २७ गते मनाइने भएको छ ।
कोरोनाबाट प्रभावित पाँच वटा देशका पर्यटकलाई जारी गरेको अन एराइभल भिसा रोक्का गरिएको र अत्यावश्यक बाहेक भ्रमण विदेश भ्रमणमा नजान ट्राभल एड्भाइजरी जारी गरेको उनले बताए ।
कोरोना प्रभावित देशमा अध्ययन गर्न जाने विद्यार्थीलाई एनओसी (नो अब्जेक्सन लेटर) जारी गर्न राकिएको छ भने अत्यावश्यक बाहेक विदेश भ्रमण गर्नमा समेत ट्राभल एड्भाइजरी जारी गरिएको छ ।
नेपाल प्रवेश नाकामा कडाइ गरेको र यात्रीले मेडिकल रिपोर्ट अनिवार्य रुपमा प्रस्तुत गर्नुपर्ने व्यवस्था गरिएको ज्ञवालीले जानकारी दिए । सरकारले कोरोना भाइरसको रोकथामका लागि तीन तहका समन्वय गर्न संयन्त्र स्थापना गरिएको पनि उनले बताए ।
उप प्रधानमन्त्री ईश्वर पोखरेलका नेतृत्वमा मन्त्रीहरु सम्मिलित कारोना भाइरस रोकथाम समन्वय समिति, मुख्य सचिवको नेतृत्वमा स्टेरिङ कमिटी र प्रधामन्त्री कार्यालयका सचिव नारायणप्रसाद बिडारीको संयोजकत्वम वर्किङ टिमले गरिरहेको छ ।
यो विषयमा आफ्नो प्रतिक्रिया दिनुहोस् !